ABŞ-da qızdırıcı mazut (Heating Oil) fyuçerslərinin qiyməti təklif risklərinin artması fonunda kəskin yüksəlib.
MONETAR.AZ xəbər verir ki, çərşənbə günü ABŞ bazarında mazut fyuçersləri 13 faizdən çox bahalaşaraq bir qallon üçün 3,75 dollara çatıb. Bu, son bir aydan artıq müddətdə qeydə alınan ən yüksək göstəricidir.
Qiymət artımının əsas səbəbləri sırasında Yaxın Şərqdə gərginliyin yenidən yüksəlməsi və enerji tədarükü ilə bağlı narahatlıqlar göstərilir. İran İnqilab Keşikçiləri Korpusunun (SEPAH) Hörmüz boğazından keçən tankerə hücumundan sonra İran və ABŞ arasında qarşılıqlı zərbələr baş verib.
Hadisələr fonunda ABŞ Prezidenti Donald Tramp mövcud atəşkəs razılaşmasının artıq qüvvədə olmadığını bildirib. Bir sıra tankerlərin strateji əhəmiyyətli keçiddən geri dönməsi də enerji bazarında narahatlığı artırıb.
Analitiklərin fikrincə, xam neft qiymətlərindəki artım emal sektorundakı məhdud imkanlar və distillə olunmuş yanacaq məhsullarında marjanın yüksəlməsi ilə daha da güclənib. Enerji şirkətləri artan xərclər fonunda satış qiymətlərini artırmağa başlayıblar.
Bundan əlavə, Rusiyanın əsas dizel istehsalçılarından biri ixracı dayandıraraq idxala keçəcəyini açıqlayıb. Buna səbəb kimi yüksək neft qiymətləri və Ukraynanın ölkənin iri neft emalı zavodlarına zərbələrinin təsirləri göstərilir.
Qeyd olunur ki, mazut qiymətləri martın sonunda rekord səviyyəyə – 4,7 dollara yüksəldikdən sonra kəskin geriləmişdi. Lakin son artımlardan sonra qiymətlər münaqişədən əvvəlki səviyyədən 40 faizdən çox yuxarıdır.
