Çin Xalq Bankı avqust ayında qızıl ehtiyatlarını 650 min troya unsiyası artırıb. Mərkəzi bankın bazar ertəsi açıqladığı məlumatlara görə, bu, 2023-cü ildən bəri qeydə alınan ən iri aylıq artımdır.
Bununla da ÇXB-nin ardıcıl qızıl alışları 22-ci aya çatıb. Mərkəzi bank dünya üzrə qiymətli metalın ən böyük rəsmi alıcılarından biri olaraq qalır.
Qızıl alışları avqust ayında qiymətli metalın ilin əvvəlindəki zəiflikdən sonra təxminən 10% bahalaşdığı dövrdə həyata keçirilib. Qiymət artımına inflyasiya və valyutaların dəyərsizləşməsi risklərinə qarşı qoruyucu aktivlərə tələbin yenidən yüksəlməsi dəstək verib.
Bazar iştirakçıları ABŞ Maliyyə Nazirliyinin dövlət borcunun geri satınalma proqramını genişləndirmək planlarını da diqqətlə izləyirlər. Bu təşəbbüs inflyasiya və ABŞ dollarının perspektivdə zəifləyə biləcəyi ilə bağlı narahatlıqları artıraraq investorların qızıl kimi alternativ qoruyucu aktivlərə marağını gücləndirib.
Analitiklərin fikrincə, Çin Xalq Bankının qızıl ehtiyatlarını artırmaqda davam etməsi, eləcə də digər mərkəzi banklar və suveren investorların alışları qızıl bazarının uzunmüddətli perspektivləri üçün müsbət amildir.
Bununla yanaşı, yüksək istiqraz gəlirlilikləri qısamüddətli perspektivdə faiz gəliri gətirməyən qızıl üçün müəyyən təzyiq yaratmağa davam edir. Buna görə də qiymətli metalın dinamikası yaxın dövrdə həm mərkəzi bankların alışlarından, həm də qlobal faiz dərəcələri və dolların hərəkətindən asılı olacaq.
MONETAR.AZ
