Almaniyanın aparıcı aviaşirkəti “Lufthansa” 2026-cı ilin üçüncü rübündə maliyyə nəticələrini yaxşılaşdırsa da, artan yanacaq xərcləri səbəbindən illik mənfəət proqnozunun yuxarı həddini aşağı salıb. Şirkətin yükdaşımalar və texniki xidmət bölmələrinin güclü fəaliyyəti rübün nəticələrini analitiklərin gözləntilərindən yüksək səviyyəyə çatdırıb.
“Lufthansa” 2026-cı il üzrə təshih edilmiş əməliyyat mənfəəti (EBIT) proqnozunu əvvəlki 1,7–2,2 milyard avro intervalından 1,7–2 milyard avroya endirib. Şirkət son aylarda yanacağın bahalaşması fonunda əvvəlki proqnoz diapazonunun yuxarı həddinə çatmağın artıq real görünmədiyini bildirib.
Şəbəkə aviaşirkətləri üzrə illik EBIT gözləntisi də 750 milyon–1,15 milyard avrodan 600–800 milyon avroya qədər azaldılıb.
Bunun əksinə olaraq, təyyarə tədarükünün gözləniləndən aşağı olması kapital xərcləri proqnozunun yenidən nəzərdən keçirilməsinə səbəb olub. Belə ki, 2026-cı il üzrə xalis kapital xərclərinin təxminən 2,5 milyard avrodan 2,1 milyard avroya enəcəyi gözlənilir.
Şirkətin üçüncü rübdə təshih edilmiş EBIT-i illik müqayisədə 6% artaraq 1,41 milyard avroya çatıb. Bu göstərici analitiklərin 1,37 milyard avroluq proqnozunu üstələyib. Ötən ilin eyni dövründə əməliyyat mənfəəti 1,33 milyard avro təşkil etmişdi.
Hesabat dövründə gəlirlər də 9% artaraq 12,24 milyard avroya yüksəlib. Bu nəticə bazarın 12,08 milyard avroluq gözləntisindən yüksək olub.
“Lufthansa”nın xalis mənfəəti isə ötən ilin üçüncü rübündəki 966 milyon avrodan 1,26 milyard avroya çatıb. Beləliklə, illik artım 30% təşkil edib.
Üçüncü rübdə ən güclü nəticələrdən biri “Lufthansa Cargo” bölməsində qeydə alınıb. Yükdaşımalar üzrə təshih edilmiş EBIT 162 milyon avroya yüksəlib. Halbuki ötən ilin eyni dövründə bu göstərici 49 milyon avro, analitiklərin gözləntisi isə 109 milyon avro olub.
Yaxın Şərqdə rəqib şirkətlərin daşıma imkanlarını azaltması və yanacaq xərclərinin yüksəlməsi yükdaşıma tariflərinin artmasına şərait yaradıb. Şirkət dördüncü rübdə də yükdaşımalar bölməsinin mənfəətinin ötən ilin müvafiq dövründəki səviyyədən aşağı olmayacağını gözləyir.
Texniki xidmət və təmir sahəsində fəaliyyət göstərən “Lufthansa Technik” də yüksək tələbatdan faydalanıb. Bölmənin təshih edilmiş EBIT-i 200 milyon avroya çatıb. Bu, ötən ilin eyni dövründəki 130 milyon avrodan xeyli çoxdur və analitiklərin 165 milyon avroluq proqnozunu üstələyir.
Şəbəkə aviaşirkətlərinin – “Lufthansa”, “Swiss”, “Austrian Airlines” və “Brussels Airlines”ın – təshih edilmiş EBIT-i isə illik müqayisədə 11% azalaraq 853 milyon avro təşkil edib. Ötən ilin eyni dövründə bu rəqəm 961 milyon avro, bazarın gözləntisi isə 904 milyon avro olub.
Aşağıbüdcəli daşıyıcı “Eurowings”in nəticələri isə müsbət dinamika nümayiş etdirib. Şirkətin təshih edilmiş EBIT-i 197 milyon avrodan 214 milyon avroya yüksələrək analitiklərin 192 milyon avroluq proqnozunu keçib.
Üçüncü rübdəki müsbət nəticələrə baxmayaraq, ilin ilk doqquz ayının yekunları daha zəif olub. Yaxın Şərqdəki böhran, aviasiya yanacağının bahalaşması, pilot və kabin heyətinin tətilləri yanvar–sentyabr dövründə şirkətin maliyyə göstəricilərinə mənfi təsir göstərib.
Nəticədə “Lufthansa”nın doqquz aylıq təshih edilmiş EBIT-i illik müqayisədə 20% azalaraq 1,48 milyard avrodan 1,18 milyard avroya düşüb.
Digər tərəfdən, yanacaq qiymətlərinin dəyişməsi ilə bağlı risklərin hecinqi şirkətə əhəmiyyətli maliyyə nəticəsi qazandırıb. Bu əməliyyatlar üzrə ötən il 204 milyon avro zərər qeydə alındığı halda, cari dövrdə 1,21 milyard avro mənfəət əldə edilib.
“Lufthansa”nın diqqət çəkən digər istiqamətlərindən biri Portuqaliyanın “TAP Air Portugal” aviaşirkətində pay əldə etmək planıdır. 14 oktyabr 2025-ci ildə Portuqaliya hökuməti Almaniya şirkətinin “TAP Air Portugal”ın 44,9%-lik səhmini almaq üçün təqdim etdiyi 1,03 milyard avroluq təklifini bəyənib. Sövdələşmənin tamamlanması üçün müvafiq tənzimləyici qurumların təsdiqi tələb olunur.
“Lufthansa” üçüncü rübdə yükdaşımalar, texniki xidmət və “Eurowings” bölmələrinin hesabına gözləntiləri üstələsə də, artan yanacaq xərcləri və şəbəkə aviaşirkətlərinin zəif nəticələri 2026-cı il üzrə mənfəət proqnozunun aşağı salınmasına səbəb olub.
MONETAR.AZ
