Polşa Milli Bankı inflyasiya təzyiqlərinin güclənməsi riskini nəzərə alaraq əsas faiz dərəcəsini dəyişməyib.
Pul-Kredit Siyasəti Şurasının dünən qəbul etdiyi qərara əsasən, əsas faiz dərəcəsi 3,75 faiz səviyyəsində saxlanılıb. Qərar “Reuters”in sorğusuna qatılan və sentyabr ayında faizlərin dəyişdirilməyəcəyini proqnozlaşdıran 29 iqtisadçının hamısının gözləntiləri ilə üst-üstə düşüb.
Mərkəzi bankın qərarında xammal və enerji daşıyıcılarının qiymətlərində artımın inflyasiya təzyiqlərini yenidən gücləndirə biləcəyi ilə bağlı narahatlıqlar əsas amillərdən biri olub.
Polşada illik inflyasiya avqust ayında sürətlənərək 3,4 faizə çatıb. Bu göstərici analitiklərin proqnozlarını üstələyib və mərkəzi bankın 1,5–3,5 faiz həcmində müəyyən etdiyi hədəf diapazonunun yuxarı sərhədinə yaxınlaşıb.
“ING”nin Polşa üzrə baş iqtisadçısı Rafal Benetskinin sözlərinə görə, inflyasiya ilə bağlı risklərin balansı artıq daha yüksək göstəricilər istiqamətində dəyişib. O, mərkəzi bankın ehtiyatlı mövqeyini qorumasına neft qiymətlərinin yüksəlməsi, geosiyasi gərginlik və 2027-ci ildə enerji daşıyıcılarının bahalaşması ehtimalının təsir etdiyini bildirib.
Benetski inflyasiyanın qarşıdakı aylarda 4 faiz səviyyəsinə yüksələ biləcəyini proqnozlaşdırıb. Onun fikrincə, faiz dərəcələrinin növbəti bir neçə rüb ərzində indiki səviyyədə saxlanılması ehtimalı daha yüksəkdir.
Analitiklər Polşada yumşaq fiskal siyasətin də pul-kredit siyasətinin gələcəkdə yumşaldılmasını çətinləşdirə biləcəyini düşünürlər. 2027-ci il üçün hazırlanan büdcə layihəsinə əsasən, dövlət büdcəsi kəsirinin ÜDM-in 7,1 faizi səviyyəsində olması nəzərdə tutulur. Müqayisə üçün, 2025-ci ildə bu göstərici 7,3 faiz təşkil edib.
MONETAR.AZ
