“Airbus SE” aviasiya konserni sentyabr ayında müştərilərinə 72 təyyarə çatdırıb. Bu, ötən ilin eyni dövrü ilə müqayisədə 1% az olsa da, şirkətin ilkin proqnozunu 4 təyyarə üstələyib.
“Jefferies” investisiya bankının analitiklərinin hesabatına əsasən, proqnozdan artıq nəticə üç əlavə A320 və bir A220 modelinin təhvil verilməsi hesabına əldə olunub.
Sentyabr ayında sifarişçilərə 8 ədəd A220, 59 ədəd A320neo, 2 ədəd A330neo və 3 ədəd A350 təyyarəsi təqdim edilib.
İlin əvvəlindən bəri təhvil verilən təyyarələrin sayı ötən ilin müvafiq dövrü ilə müqayisədə 8% artıb. Bununla belə, “Airbus”un illik 870 təyyarəlik hədəfinə çatması üçün oktyabr-dekabr aylarında tədarük həcmini 13% artırması tələb olunur.
Sentyabrda şirkət 17 yeni sifariş qeydə alıb, eyni zamanda 3 sifariş ləğv edilib. İllik xalis sifarişlərin təhvil verilən təyyarələrə nisbətini göstərən book-to-bill əmsalı 2,02 səviyyəsində olub.
Üçüncü rübün sonunda uçuşa hazır vəziyyətdə olan təyyarələrin ehtiyatı ikinci rüblə müqayisədə 23 ədəd artaraq 66 vahidə çatıb.
Məhsul strukturunda daha az mənfəət gətirən modellərin payının artması da diqqət çəkir. Üçüncü rübdə təhvil verilən təyyarələrin sayı ötən ilin eyni dövrü ilə müqayisədə 5 ədəd azalıb. A320 ailəsinin tədarüklərində A321 modelinin payı 64% təşkil edib. 2025-ci ilin üçüncü rübündə bu göstərici 67% idi.
“Jefferies”in qiymətləndirməsinə görə, uçuşa hazır təyyarələrdən əlavə, ehtiyatda 35–40 ədəd tamamlanmamış təyyarə gövdəsi və ya planer qalır.
Analitiklər xəbərdarlıq edirlər ki, tədarük həcmi, məhsul strukturu və texniki amillər “Airbus Commercial” bölməsinin üçüncü rübdə faiz və vergilərdən əvvəlki mənfəətinə (EBIT) 100–200 milyon avro mənfi təsir göstərə bilər.
Bundan başqa, uçuşa hazır təyyarələrin ehtiyatının rüb ərzində 23 vahid artması şirkətin pul axınına əlavə təzyiq yarada bilər.
MONETAR.AZ
