2026-cı ilin yanvar-sentyabr aylarında Azərbaycanda nəqliyyat vasitələri ilə sərnişin daşınmasının ümumi həcmi əvvəlki ilin eyni dövrü ilə müqayisədə artıb. Ayrı-ayrı nəqliyyat növlərində isə dəyişikliklər fərqli olub.
Monetar.az xəbər verir ki, Dövlət Statistika Komitəsinin hesabatına əsasən, dəniz nəqliyyatı ilə sərnişin dövriyyəsi ötən ilin eyni dövrü ilə müqayisədə 2,05 dəfə artıb.
Bununla belə, dəniz nəqliyyatının ümumi sərnişin dövriyyəsindəki həcmi nisbətən kiçikdir. Göstərici 17,6 milyon sərnişin-kilometr təşkil edib.
Dəmir yolu nəqliyyatında sərnişin dövriyyəsi 21,6% artaraq 400,8 milyon sərnişin-kilometrə çatıb. Avtomobil nəqliyyatında artım 10,9%, hava nəqliyyatında isə 5,5% olub.
Metro nəqliyyatında isə əksinə, sərnişin dövriyyəsi illik müqayisədə 3,7% azalıb.
