Çinin cənubunda yerləşən Hainan əyaləti ölkədə ilk dəfə olaraq daxili yanma mühərrikli avtomobillərin mərhələli şəkildə bazardan çıxarılmasını nəzərdə tutan genişmiqyaslı proqram qəbul edib. "CarNewsChina" nəşrinin məlumatına görə, yerli hakimiyyət orqanları 2030-cu ildən etibarən benzin və dizellə işləyən yeni avtomobillərin satışının tam dayandırılmasını nəzərdə tutan yol xəritəsini ictimaiyyətə təqdim ediblər.
Bu qərar Çin miqyasında bir əyalət səviyyəsində qəbul edilən ilk tammiqyaslı təşəbbüs hesab olunur. Rəsmilər hesab edirlər ki, Hainanın coğrafi xüsusiyyətləri elektromobil nəqliyyatına keçidi digər regionlarla müqayisədə daha əlverişli edir. Təxminən 35,4 min kvadratkilometr əraziyə malik ada boyunca uzanan 612,8 kilometrlik G98 dairəvi avtomagistralı müasir elektromobillərin bir enerji doldurması ilə rahat hərəkət etməsinə imkan yaradır. Bu isə enerji doldurma şəbəkəsinin qurulmasını və idarə edilməsini xeyli asanlaşdırır.
Əyalətdə enerji keçidi artıq sürət qazanıb. 2026-cı ilin ortalarına olan məlumata görə, elektrik enerjisi istehsalında əsas pay bərpaolunan enerji mənbələrinin üzərinə düşür. Hainan elektromobillərin bazar payına görə Çin üzrə birinci, ümumi elektromobil sayına görə isə əyalətlər arasında ikinci yerdə qərarlaşıb.
Hazırlanan plana əsasən, 2030-cu ilə qədər yeni enerji mənbələri ilə işləyən nəqliyyat vasitələrinin ümumi avtomobil parkındakı payı 45%-i ötməlidir. Həmin ildən etibarən hökumət qurumlarının, kommunal xidmətlərin, ictimai nəqliyyatın və sərnişindaşıma sektorunun bütün yeni avtomobilləri yalnız təmiz enerji ilə işləməli olacaq. Eyni tələb yeni alınacaq və ya yenilənəcək şəxsi minik avtomobillərinə də şamil ediləcək. Yalnız xüsusi təyinatlı texnika üçün istisna nəzərdə tutulur.
İnfrastrukturun bu transformasiyaya uyğun inkişafı da proqramın əsas hissəsidir. Hakimiyyət enerji doldurma məntəqələrinin sayını avtomobil parkının artım tempinə uyğun genişləndirməyi planlaşdırır. Məqsəd enerji doldurma qurğuları ilə elektromobillər arasındakı nisbəti 2,5:1 səviyyəsindən aşağı saxlamaqdır.
Bununla yanaşı, rəsmilər etiraf edirlər ki, keçid prosesi ciddi çağırışlarla müşayiət olunacaq. Hələ 2022-ci ildə enerji doldurma və hidrogen yanacaqdoldurma stansiyalarının şəhərsalma layihələrinə inteqrasiyası, həmçinin elektrik şəbəkəsinə düşən əlavə yük əsas problemlər kimi qiymətləndirilmişdi. Hainan enerji sisteminin Cənubi Enerji Halqasının sonunda yerləşməsi və xarici enerji tədarükündən asılılığı səbəbindən yüksək elektrik tarifləri ilə də üzləşir.
Bu riskləri azaltmaq üçün əyalət rəhbərliyi atom energetikası və bərpaolunan enerji layihələrinə investisiyaları artırmağı planlaşdırır. Strategiyaya əsasən, 2030-cu ilədək Hainanın enerji müstəqilliyi 54%-ə çatdırılmalıdır.
Eyni zamanda, daxili yanma mühərrikli avtomobillərdən imtinanı sürətləndirmək məqsədilə elektromobil sahiblərinə əlavə üstünlüklər təqdim ediləcək. Yeni tədbirlər paketinə qeydiyyat prosedurlarının sadələşdirilməsi, hərəkət imkanlarının genişləndirilməsi və parklanma sahəsində müxtəlif güzəştlərin tətbiqi daxildir.
MONETAR.AZ
