Məşhur təmir və texniki ekspertiza platforması iFixit “Apple” şirkətinin yeni təqdim etdiyi qatlanan iPhone Duo smartfonunu hissələrinə ayıraraq cihazın təmir olunma imkanlarını qiymətləndirib.
Araşdırmanın nəticələrinə görə, daxili komponentlərin əksəriyyətini mürəkkəb sökülmə əməliyyatları aparmadan çıxarmaq mümkündür. Bu xüsusiyyət cihazı “Samsung”un analoji qatlanan smartfonlarından fərqləndirir. Bununla belə, mürəkkəb şarnir mexanizmi ilə bağlı suallar hələ də açıq qalır.
Bəzi iPhone Duo istifadəçiləri smartfonu qatlayarkən xırıltı səsi eşitdiklərini, bundan sonra isə daxili ekranda şaquli parlaq zolaqlar yarandığını bildiriblər.
iFixit-in sökülmə və texniki təhlil nəticələrinə əsasən, ekran zədələri əsasən birləşdirici şleyf üçün nəzərdə tutulmuş kəsiyin şarnirin mərkəzi dayaq hissəsi ilə birləşdiyi nöqtənin yaxınlığında müşahidə olunur.
Ekspertlər mexanizmin üçölçülü modelini hazırlayaraq zədələrin mümkün səbəbləri ilə bağlı bir neçə fərziyyə irəli sürüblər.
İlk ehtimala görə, smartfon bağlanarkən mərkəzi dayaq lövhəsi tam geri çəkilməyə və ekrana təzyiq göstərməyə bilər. Digər fərziyyə qatlanma mexanizminin hərəkəti pozulduqda yönəldici elementlərin displeyə aşağıdan toxunaraq onu zədələməsi ilə bağlıdır.
Bundan əlavə, bir neçə sərt metal kənarın eyni zonada kəsişməsi mexaniki gərginliyi artıra bilər. Bununla belə, iFixit-in irəli sürdüyü bu ehtimallar hələlik təsdiqlənmiş səbəblər deyil və əlavə araşdırma tələb edir.
iFixit smartfonun təmir olunma imkanlarını ilkin mərhələdə 10 baldan 5 balla qiymətləndirib. Platformanın məlumatına görə, bu, onun indiyədək sınaqdan keçirdiyi qatlanan smartfonlar arasında ən yüksək nəticədir.
Cihazın üstünlüklərindən biri daxili ekranın çərçivəsinin xüsusi bərkidici mexanizmlərlə birləşdirilməsidir. Bu, çərçivənin zədələnmə riski az olmaqla çıxarılmasını asanlaşdırır. Xarici ekranın sökülməsi də nisbətən rahatdır.
Bununla belə, smartfonun yekun təmir qiymətləndirməsi “Apple”ın rəsmi ehtiyat hissələrini müstəqil təmir ustaları və istifadəçilər üçün hansı şərtlərlə əlçatan edəcəyindən asılı olacaq.
MONETAR.AZ
