Dünyanın aparıcı süni intellekt (Sİ) şirkətlərində çalışan 1 000-dən çox əməkdaş ABŞ hökumətini süni intellekt texnologiyalarının inkişaf tempini müvəqqəti olaraq yavaşlatmağa çağırıb. Onların fikrincə, təhlükəsizlik və nəzarət mexanizmləri texnologiyanın inkişaf sürətindən geri qalır.
Açıq məktubda qeyd olunur ki, ABŞ hökuməti "avtomatlaşdırılmış süni intellektin inkişafını məqsədyönlü şəkildə ləngitməyə" imkan verəcək texniki və idarəetmə alətlərinin hazırlanmasına yönəlmiş beynəlxalq təşəbbüsləri dəstəkləməlidir.
"CNN Business"-in məlumatına görə, məktubu qabaqcıl Sİ şirkətlərinin 1 000-dən çox əməkdaşı imzalayıb. Onların arasında "OpenAI"-ın baş elmi işçisi və "ChatGPT"-nin həmtəsisçilərindən biri, "Anthropic"-in bir neçə həmtəsisçisi, eləcə də müxtəlif texnologiya şirkətlərinin vitse-prezidentləri yer alır.
Müraciət süni intellekt sistemlərinin son aylarda nümayiş etdirdiyi sürətli inkişaf və bunun yaratdığı təhlükəsizlik riskləri fonunda hazırlanıb.
Bu günlərdə "OpenAI" iki eksperimental modelinin laboratoriya mühitindən kənara çıxaraq açıq internetə çıxış əldə etməyə çalışdığını və başqa bir şirkətin daxili sisteminə icazəsiz müdaxilə etdiyini açıqlamışdı.
Məktub müəllifləri bildirirlər ki, texnologiyanın inkişaf tempi elə bir həddə çata bilər ki, insanlar yaratdıqları sistemləri artıq tam anlaya və ya effektiv şəkildə idarə edə bilməsinlər.
"Texnologiyanın inkişafının yaratdığımız sistemləri anlaya və ya idarə edə bilməyəcəyimiz dərəcədə sürətlənməsi real təhlükədir. Süni intellektin potensialını təhlükəsiz şəkildə reallaşdırmaq üçün sənayeyə, hökumətə və cəmiyyətə riskləri qiymətləndirmək, təhlükəsizlik tədbirlərini hazırlamaq və nəzarət mexanizmlərini gücləndirmək məqsədilə əlavə vaxta ehtiyac yarana bilər", — məktubda deyilir.
"OpenAI" CNN-ə açıqlamasında Sİ-nin inkişaf tempinin müvəqqəti zəiflədilməsinin zəruriliyi ilə bağlı narahatlıqları bölüşdüyünü və bu istiqamətdə ABŞ hökuməti ilə əməkdaşlığa hazır olduğunu bildirib.
Şirkətin baş icraçı direktoru Sem Altman da son podkast müsahibəsində bəlkə də süni intellektin inkişaf tempini yavaşlatmağın vaxtının çatdığını qeyd edib.
"Cəmiyyətin yeni imkanlara uyğunlaşması üçün kifayət qədər vaxtı olsun deyə, bəlkə də süni intellektin inkişaf tempini zəiflətməli olacağıq", — Altman bildirib.
"Anthropic" da oxşar mövqe nümayiş etdirərək bildirib ki, sənayedə təhlükəsizlik naminə inkişafın müəyyən qədər yavaşladılması zərurəti barədə getdikcə daha geniş konsensus formalaşır.
Şirkətin açıqlamasında qeyd olunur ki, cəmiyyətin yeni texnologiyalara hazırlaşa bilməsi üçün inkişaf tempini tənzimləməyə imkan verəcək texniki və institusional mexanizmlərin yaradılması vacibdir.
Bu mövqe digər aparıcı texnologiya liderləri tərəfindən də dəstəklənir. "Google DeepMind"-ın baş icraçı direktoru Demis Hassabis yeni nəsil Sİ modelləri üçün beynəlxalq təhlükəsizlik standartlarını hazırlayacaq ayrıca qlobal qurumun yaradılmasını təklif edib. Bu təşəbbüs Sem Altman, "Microsoft" rəhbəri Satya Nadella, "SpaceX" rəhbəri İlon Mask və digər sənaye nümayəndələri tərəfindən də dəstəklənib.
Daha sonra "Thinking Machines" laboratoriyasının təsisçisi və "OpenAI"-ın həmtəsisçilərindən biri Con Şulman məktuba əlavə etdiyi şərhdə bildirib ki, təşəbbüs avtomatlaşdırılmış Sİ tədqiqatlarının sürətləndiyi bir dövrdə koordinasiya və təhlükəsizlik mexanizmlərinə ehtiyac barədə ümumi anlayışın formalaşmasına xidmət edir.
Şulman hesab edir ki, hökumət müdaxilə etməzdən əvvəl Sİ laboratoriyaları belə təhlükəsizlik mexanizmlərini könüllü əsasda hazırlamağa başlamalıdır.
MONETAR.AZ
