Apple iOS əməliyyat sistemində aşkar edilmiş təhlükəsizlik zəifliklərini və proqram xətalarını aradan qaldırmaq üçün iPhone istifadəçilərini cihazlarını təcili yeniləməyə çağırıb. Bu barədə Forbes nəşri məlumat yayıb.
Məlumata görə, şirkət iOS 26.6 versiyasını istifadəyə verib. Apple bildirib ki, yenilənmə çərçivəsində iPhone cihazlarında aşkarlanmış 90-dan çox təhlükəsizlik boşluğu aradan qaldırılıb.
"Bu yenilənmə yeni funksiyaların sayına görə məhdud olsa da, çoxlu sayda təhlükəsizlik düzəlişləri ilə seçilir. Eyni zamanda, payızda təqdim olunması gözlənilən daha ağıllı Siri versiyası üçün zəmin yaradır", — deyə Forbes qeyd edir.
Nəşrin məlumatına əsasən, Apple təhlükəsizlik boşluqlarının texniki təfərrüatlarını açıqlamayıb. Bununla belə, ekspertlər iOS 26.6 yenilənməsində Safari brauzerinin əsasını təşkil edən WebKit mühərrikindəki mühüm zəifliklərin aradan qaldırıldığını bildiriblər.
Xservus Limited şirkətinin kibertəhlükəsizlik üzrə məsləhətçisi Deniel Kardın sözlərinə görə, CVE-2026-64730 zəifliyi fişinq (phishing) məqsədilə istifadəçi interfeysinin saxtalaşdırılmasına (spoofing) imkan verirdi. CVE-2026-64735 zəifliyi şəbəkə təhlükəsizlik filtrlərinin yan keçilməsinə şərait yaradırdı, CVE-2026-64721 isə hakerlərə məxfi istifadəçi məlumatlarına çıxış əldə etmək imkanı verə bilirdi.
Bundan əvvəl BGR nəşri də qeyd etmişdi ki, iPhone modelləri uzunmüddətli proqram təminatı dəstəyi sayəsində ikinci əl bazarında daha yüksək dəyərini qoruyur. Nəşr həmçinin Apple cihazlarının geniş təhlükəsizlik mexanizmləri ilə təchiz olunduğunu vurğulayıb.
MONETAR.AZ
