“Bloomberg” agentliyinin bu gün məsələ ilə tanış mənbələrə istinadən yaydığı məlumata görə, Tayvan ABŞ ilə sıx koordinasiya çərçivəsində Çinə süni intellekt (Sİ) çiplərinin tədarükünə tətbiq olunan ixrac nəzarətini əhəmiyyətli dərəcədə sərtləşdirməyi nəzərdən keçirir.
Hazırlanan yeni tənzimləyici tədbirlər çip kontrabandasına qarşı mübarizə strategiyasının bir hissəsidir. Məqsəd Tayvan hakimiyyətinə qabaqcıl texnoloji avadanlıqların, xüsusilə “Nvidia” çipləri ilə təchiz edilmiş AI serverlərinin Tayvandan dolayı yollarla Çinə ötürülməsinin qarşısını almaq üçün əlavə hüquqi mexanizmlər və səlahiyyətlər verməkdir.
Bu təşəbbüs Pekinlə münasibətlərdə gərginliyin daha da artmasına səbəb ola bilər. Çin ABŞ-ın 2022-ci ildən tətbiq etməyə başladığı və sonradan genişləndirdiyi texnoloji məhdudiyyətlərə kəskin etiraz edir.
Rəsmi ixrac qadağalarına baxmayaraq, “Nvidia”nın qabaqcıl Sİ çipləri Cənub-Şərqi Asiya ölkələri üzərindən həyata keçirilən qeyri-qanuni tədarük sxemləri vasitəsilə Çin bazarına daxil olmağa davam edir.
Bu istiqamətdə diqqət çəkən işlərdən biri server istehsalçısı “Super Micro Computer” şirkəti ilə bağlı ABŞ Ədliyyə Nazirliyinin apardığı istintaqdır. Şirkətin bəzi əməkdaşları bu il ən azı 2,5 milyard dollar dəyərində “Nvidia” çiplərinin qanunsuz yollarla Çinə ötürülməsində şübhəli bilinirlər. İş çərçivəsində “Super Micro”nun həmtəsisçisi İhsyan Lyao (Yih-Shyan Liaw) ABŞ hüquq-mühafizə orqanları tərəfindən həbs edilib.
İstintaq materiallarında “Nvidia”nın Tayvandakı bölməsinin əməkdaşlarının da qanunsuz tədarük şəbəkəsi ilə əlaqəli ola biləcəyinə dair məlumatların olduğu bildirilir.
Transmilli kontrabanda kanallarının üzə çıxarılması Tayvan hökumətinin ixrac qaydalarını sərtləşdirmək və pozuntulara görə məsuliyyət mexanizmlərini gücləndirmək istiqamətində addımlarını sürətləndirə bilər. Bu prosesdə ABŞ ilə əməkdaşlıq qabaqcıl yarımkeçirici texnologiyaların Çinə ötürülməsinin qarşısını almaq baxımından mühüm əhəmiyyət daşıyır.
MONETAR.AZ
