“Alphabet Inc.” korporasiyasına məxsus “YouTube” platforması audiokitab xidmətini işə salmaq üçün iri nəşriyyat evləri ilə danışıqlar aparır. Yeni xidmətin təqdimatının gələn il baş tutacağı gözlənilir.
Bu barədə “The Wall Street Journal” (WSJ) nəşri məsələ ilə tanış olan mənbələrə istinadən məlumat yayıb.
Məlumata görə, “YouTube” audiokitab xidmətini aylıq 15,99 dollar təşkil edən “YouTube Premium” abunə paketinə inteqrasiya etmək imkanlarını nəzərdən keçirir. Hazırda bu paket istifadəçilərə reklamsız video və musiqi məzmunundan yararlanmaq imkanı verir.
Bununla belə, audiokitabların yeni xidmət çərçivəsində necə təqdim ediləcəyi hələlik məlum deyil. Kitabların Premium abunəliyinə daxil ediləcəyi, yoxsa istifadəçilərin ayrı-ayrı əsərlər üçün əlavə ödəniş etməli olacağı barədə rəsmi məlumat açıqlanmayıb.
Audiokitab bazarına daxil olmaq “YouTube”u bu sahənin əsas oyunçuları olan “Spotify” və “Amazon” şirkətinə məxsus “Audible” platforması ilə birbaşa rəqabətə çıxara bilər.
Son illərdə podkast və digər audio məzmunların həcmini genişləndirən “YouTube” üçün audiokitab xidməti platformanın məzmun ekosistemini daha da inkişaf etdirmək imkanı yarada bilər.
Yeni xidmətin istifadəyə verilməsi, həmçinin “YouTube Premium” abunəçiləri üçün təklif olunan imkanların artırılmasına və istifadəçilərin platformada daha uzun müddət qalmasına xidmət edə bilər. Bununla belə, xidmətin yekun formatı və qiymət siyasəti barədə qərar hələ açıqlanmayıb.
MONETAR.AZ
