Dövlət İmtahan Mərkəzi (DİM) tərəfindən 3 may 2026-cı il tarixində tədris dili Azərbaycan dilindən fərqli olan 9-cu və 11-ci sinif şagirdləri, həmçinin qəbul imtahanını rus və ya digər dillərdə verən əvvəlki illərin məzunları üçün keçirilən Azərbaycan dili (dövlət dili kimi) imtahanının nəticələri rəsmən elan olunub.
İmtahanda iştirakı nəzərdə tutulan 29 182 nəfərdən 477-si imtahana gəlməyib. Nəticələr artıq DİM-in rəsmi internet səhifəsində yerləşdirilib.
İştirakçılar DİM-in saytında şəxsi məlumatlarını daxil etməklə nəticələrlə, cavab vərəqinin qrafik təsviri və açıq tipli tapşırıqların qiymətləndirmə meyarları ilə tanış ola bilərlər. Giriş qaydası:
-
Cari ilin məzunları: 8 rəqəmli şagird kodu və şəxsiyyət vəsiqəsinin nömrəsi (və ya FİN kodu) ilə;
-
Əvvəlki illərin məzunları: Şəxsi kabinetin istifadəçi adı və parolu ilə.
3 may imtahanından "qeyri-məqbul" alan və ya həmin imtahanda iştirak edə bilməyən abituriyentlər üçün növbəti şans yaradılır. Onlar 21 iyun 2026-cı il tarixində keçiriləcək ikinci Azərbaycan dili imtahanında iştirak edə bilərlər.
-
İkinci imtahana qeydiyyat tarixləri: 25 may – 2 iyun 2026-cı il.
İmtahan nəticələri ilə razılaşmayan iştirakçılar üçün DİM-də Apellyasiya Komissiyası fəaliyyət göstərəcək.
-
Müraciət müddəti: 19 may saat 10:00-dan 21 may saat 17:00-dək DİM-in saytında elektron ərizə doldurulmalıdır. Bu müddətdən sonra qeydiyyat aparılmayacaq.
-
Ərizənin doldurulma şərti: Elektron ərizədə etiraz edilən tapşırığın nömrəsi seçilməli, müraciətin məzmunu əsaslandırılmalı və qiymətləndirmə meyarının hansı bəndinə uyğun hesab edildiyi yazılmalıdır. Məzmun qeyd olunmayan ərizələr araşdırılmayacaq.
-
Cavab vərəqində təlimata uyğun olmayan qaralamalar, qapalı sualda iki dairənin rənglənməsi kimi optik qurğunun səhv oxumasına səbəb olan texniki düzəlişlərlə bağlı müraciətlərə baxılmır.
-
Tapşırığa ümumiyyətlə cavab verməyən və ya öz cavabını saytdakı doğru cavablar və qiymətləndirmə şkalası ilə müqayisə etmədən yazılan ərizələr (təcrübədə müraciətlərin 15%-ni təşkil edir) araşdırılmır.
Apellyasiya prosesinin gedişatı:
-
Komissiya müraciət olunan işləri yenidən ekspertizadan keçirir.
-
Tapşırıqlar üzrə yazılı ekspert rəyi apellyasiya ərizəsinə əlavə olunur.
-
Proses bitdikdə iştirakçının ərizədə qeyd etdiyi nömrəyə SMS bildiriş göndərilir.
-
İştirakçı apelyasiya.dim.gov.az saytına daxil olaraq yekun qərar və rəsmi ekspert rəyi ilə tanış ola bilər.
