Hindistan və Rusiya arasında enerji və xammal ticarəti yeni bir strateji mərhələyə qədəm qoyur. Hindistanın polad sənayesi nazirinin müavini Sandip Paundrik (Sandeep Poundrik) TASS agentliyinə verdiyi rəsmi açıqlamada ölkəsinin Rusiyadan idxal etdiyi koks kömürünün (metallurgiya kömürü) həcmini yaxın illərdə 2 və ya 3 dəfə artırmağı planlaşdırdığını bəyan edib.
Nazir müavini vurğulayıb ki, Yeni Dehli üçün tədarük həcmlərində heç bir süni limit yoxdur; Hindistan tərəfi üçün yeganə və əsas şərt məhsulun rəqabətədavamlı qiyməti və yüksək keyfiyyət standartlarına cavab verməsidir.
Hindistanın polad sənayesində Rusiya xammalının payı sürətlə genişlənir. Rusiya hazırda Hindistana ildə təxminən 8–9 milyon ton koks kömürü ixrac edir.
Yeni müqavilələr və logistik xətlər sayəsində bu rəqəmin ildə 16–27 milyon tona çatdırılması nəzərdə tutulur. Hindistan bu strateji xammalın alışı üzrə dünyada Çindən sonra Rusiyanın ikinci ən böyük müştərisidir.
Rusiyanın Hindistanın ümumi koks kömürü idxalındakı payı hazırda 18–22% arasında dəyişir və bu göstəricinin kəskin artacağı gözlənilir. 2026-cı ilin ilk rübündə Hindistanda polad istehsalı illik müqayisədə 10,7% artaraq 44,7 milyon tona çatıb. Polad zavodlarının yüksək tempini təmin etmək üçün ölkə yalnız bu ilin ilk rübündə ümumi koks kömür idxalını 7% artıraraq 18,2 milyon tona çatdırıb.
Analitiklər qeyd edirlər ki, Qərbin sanksiyaları səbəbindən Avropa bazarını itirən Rusiya öz kömürünü cəlbedici endirimlərlə Asiyaya yönəldir. İnfrastruktur bumu yaşayan Hindistan üçün isə ucuz və keyfiyyətli Rusiya xammalı yerli poladın maya dəyərini aşağı salmaq və qlobal bazarlarda rəqabət üstünlüyü qazanmaq üçün ən ideal iqtisadi fürsətdir.
MONETAR.AZ
