Dövlət İmtahan Mərkəzi (DİM) 14 iyun 2026-cı il tarixində keçiriləcək magistraturaya qəbul imtahanının ikinci cəhdi üçün bakalavrların ərizə qəbulunu elan edib. İmtahanda təkrar iştirak etmək istəyən namizədlər 23 may saat 23:59-dək internet vasitəsilə qeydiyyatdan keçməlidirlər.
Bu imtahanda 17 may tarixində keçirilmiş birinci cəhd üçün qeydiyyatdan keçmiş bütün bakalavrlar iştirak etmək hüququna malikdirlər. İmtahan təşkilati və logistik səbəblərdən yalnız Bakı, Abşeron və Sumqayıt şəhərlərində təşkil olunacaq.
İmtahanda iştirak etmək istəyən namizədlər üçün ödəniş şərtləri onların 17 may imtahanındakı statusuna görə tənzimlənir:
-
Ödənişsiz iştirak hüququ: 17 may tarixli imtahanda iştirak etmək üçün buraxılış vərəqəsini əldə etmiş, lakin əlverişsiz hava şəraiti (regionlardan gediş-gəlişin məhdudlaşması və s.) ilə bağlı Bakı, Abşeron və Sumqayıtda imtahana qatıla bilməyən bakalavrlar üçün bu imtahan tamamilə ödənişsizdir.
-
Ödənişli iştirak: Birinci cəhddə iştirak etmiş və ya müvafiq qaydada qeydiyyatdan keçib imtahana gəlməyən digər bakalavrlar isə öz istəklərinə uyğun olaraq müvafiq tariflə ödəniş etməklə imtahanda yenidən qüvvələrini sınaya bilərlər.
Qəbul imtahanında 2 və ya 3 dəfə iştirak etmiş bakalavrlar üçün böyük üstünlük yaradılıb. Belə ki, yekun ixtisaslaşma seçimi (ixtisas seçimi) zamanı namizədlər məhz müsabiqə şərtlərini ödəyən ən yüksək nəticələrini seçərək müsabiqəyə qatıla biləcəklər. Yəni, ikinci cəhddə toplanan bal birincidən aşağı olarsa, bu, namizədin ümumi müsabiqə şansına mənfi təsir etmir.
İmtahanda iştirak etmək istəyən namizədlər aşağıdakı rəsmi keçid vasitəsilə ərizələrini təsdiq etməlidirlər:
-
Qeydiyyat linki: DİM Magistratura Ərizə Sistemi
-
Son qeydiyyat tarixi: 23 may 2026-cı il, saat 23:59
