Avropa robot texnologiyaları üçün mühüm hissələrin istehsalında qlobal lider mövqeyini qoruyur.
Monetar.az xəbər verir ki, xüsusilə robotların hərəkət mexanizmlərində istifadə olunan aktuatorların (hərəkət yaradan komponentlərin) tədarükündə Avropa dünya bazarında əsas paya sahibdir.
“Barclays” məlumatlarına əsasən, qlobal aktuator tədarükünün 34 faizi Avropanın payına düşüb. Çin isə 26,3 faizlik göstərici ilə ikinci yerdə qərarlaşıb.
Avropa daxilində ən böyük pay Almaniyaya məxsusdur. Ölkə dünya üzrə aktuator ticarət axınlarının 10,7 faizini təmin edir ki, bu da Avropanın ümumi tədarük payının təxminən üçdə birinə bərabərdir. Almaniyadan sonra İsveçrə 3,8 faiz, İtaliya isə 3,7 faiz payla fərqlənir.
Bununla yanaşı, Meksika 9 faiz, Yaponiya 5,4 faiz və ABŞ 5,1 faiz göstərici ilə aktuator bazarında mühüm iştirakçılar sırasındadır.
Ekspertlərin fikrincə, bu göstəricilər robot texnologiyalarının istehsal zəncirində sənaye imkanlarının ayrı-ayrı regionlarda cəmləşdiyini göstərir. Almaniya, Çin və Meksika ilə yanaşı, bütövlükdə Avropa robototexnika sahəsində əsas təchizat mərkəzlərindən biri hesab olunur.
Avropanın üstünlüklərindən biri də avtomobil sənayesində formalaşmış güclü istehsal əlaqələridir. Xüsusilə mürəkkəb mexaniki sistemlərin hazırlanmasında uzun illər ərzində toplanmış təcrübə robot komponentlərinin istehsalını sürətləndirməyə imkan verir.
Bununla belə, robotların proqramlaşdırılması və süni intellekt həllərinin hazırlanması sahəsində əsas üstünlük daha çox ABŞ və Çində cəmlənib.
Mütəxəssislər hesab edirlər ki, gələcəkdə humanoid robotlara tələbat artarsa, Avropa və Meksika dəqiq mühəndislik sahəsindəki imkanlarından istifadə edərək qlobal robot bazarında mühüm təchizatçı mövqeyini daha da gücləndirə bilər.
