Əsas sənaye metallarının qiymətləri bugün geriləyib. "Bloomberg" xəbər verir ki, investorlar ABŞ Federal Ehtiyat Sisteminin (FED) faiz dərəcələrini artırmaq ehtimalını və bunun qlobal tələbə mümkün təsirlərini qiymətləndirirlər.
Son günlər FED rəsmilərinin bir qismi inflyasiya risklərinin davam etdiyini bildirərək faiz dərəcələrinin yenidən artırıla biləcəyi barədə xəbərdarlıq edib. Bu isə istehsalçılar üçün borclanma xərclərinin yüksəlməsi və sənaye metallarına tələbin zəifləməsi riskini artırır.
ABŞ-da bu həftə açıqlanan gözləntilərdən aşağı inflyasiya göstəriciləri qısa müddət ərzində faiz artımı ilə bağlı narahatlıqları azaltsa da, Yaxın Şərqdə hərbi əməliyyatların yenidən intensivləşməsi inflyasiya və qlobal iqtisadi artımla bağlı qeyri-müəyyənliyi yenidən gündəmə gətirib.
Sinqapur vaxtı ilə saat 10:09-a olan məlumata görə, London Metallar Birjasında (LME) misin qiyməti 0,7% azalaraq ton üçün 13 499 dollara enib. Alüminium 0,4%, sink 0,8%, qurğuşun isə 0,1% ucuzlaşıb. "Trafigura Group" tərəfindən həyata keçirilən tədarüklər nəticəsində LME anbarlarında qurğuşun ehtiyatlarının rekord həddə çatması fonunda metal həftəni 1,4%-lik itki ilə başa vurmağa yaxınlaşır. Sinqapur bazarında dəmir filizi fyuçersləri isə 0,1% bahalaşıb.
Qlobal buğda bazarında da mənfəət realizasiyası fonunda qiymətlər aşağı düşüb. Treyderlər Qara dəniz regionunda davam edən riskləri və ABŞ-dan zəif ixrac tələbi göstəricilərini qiymətləndirirlər.
Ən aktiv buğda fyuçersləri 1%-ə qədər ucuzlaşıb. Cümə axşamı qiymətlər 2024-cü ilin may ayından bəri ən yüksək səviyyəyə yüksəlsə də, ABŞ Kənd Təsərrüfatı Nazirliyinin həftəlik ixrac satışlarının cəmi 235 min ton olduğunu açıqlaması — bu da son iki ayın minimum göstəricisidir — bazarda satışların artmasına səbəb olub.
Bununla belə, Rusiya ilə Ukrayna arasında davam edən gərginlik qiymətlərə dəstək verən əsas amillərdən biri olaraq qalır.
"Qara dənizdəki vəziyyət hələ də qlobal buğda bazarının əsas hərəkətverici qüvvəsidir. Lakin son 18 saat ərzində gərginliyin daha da artmaması treyderlərin mənfəəti fiksə etməsinə şərait yaradıb", — deyə "Futures International LLC" şirkətinin xammal satışları şöbəsinin rəhbəri Co Devis bildirib.
Xatırladaq ki, Çikaqo əmtəə birjasında buğda qiymətləri çərşənbə günü Qara dəniz regionunda hərbi əməliyyatların taxıl ixracına mənfi təsir göstərə biləcəyi ilə bağlı narahatlıqlar fonunda son iki ayın ən yüksək səviyyəsinə yüksəlmişdi.
MONETAR.AZ
