“Liverpul” futbol klubu növbəti mövsümdən etibarən əsas forma sponsorunu dəyişəcək. Komandanın formalarının üzərində “Standard Chartered” bankının əvəzinə “Turkish Airlines” aviaşirkətinin loqotipi yer alacaq.
Klub sentyabrın 8-də “Turkish Airlines”ın 2027-ci ilin iyunundan əsas tərəfdaş olacağını açıqlayıb. Aviaşirkətin brendi 2027/28 mövsümünün əvvəlindən etibarən klubun kişi, qadın və akademiya komandalarının formalarının ön hissəsində yerləşdiriləcək. “Standard Chartered” isə 2026/27 mövsümünün sonunadək əsas tərəfdaş olaraq qalacaq, daha sonra qlobal tərəfdaş statusuna keçəcək.
Tərəflər arasında müqavilənin beş il müddətinə bağlandığı bildirilir. Müqavilənin maliyyə şərtləri rəsmi olaraq açıqlanmasa da, “The Times”, “The Guardian” və digər mənbələrin məlumatına görə, sazişin ümumi dəyəri 300 milyon funt-sterlinqdən çoxdur. Bu isə “Liverpul”a ildə 60 milyon funt-sterlinqdən artıq gəlir gətirəcəyi anlamına gəlir.
Bu göstərici İngiltərə Premyer Liqasında yalnız formanın ön hissəsinin sponsorluğu üzrə rekord hesab olunur və “Mançester Yunayted”in “Qualcomm” şirkəti ilə “Snapdragon” brendi üzərindən əldə etdiyi müqavilənin səviyyəsinə çatır. Bununla belə, digər klubların sponsorluq paketlərinə stadionun adlandırılması və məşq formalarının sponsorluğu kimi əlavə hüquqlar da daxil olduğundan müqayisə tam eyni deyil.
Məsələn, “Arsenal”ın “Emirates”lə əməkdaşlığının illik gəlirinin təxminən 70 milyon funt-sterlinq olduğu bildirilir. Lakin bu məbləğə stadionun adlandırılması və məşq dəstlərində brendin yerləşdirilməsi kimi hüquqlar da daxildir.
“Liverpul”un yeni müqaviləsi hazırkı tərəfdaşı “Standard Chartered” ilə müqayisədə də əhəmiyyətli artım deməkdir. Bank 2010-cu ildən klubun əsas forma sponsoru kimi çıxış edir və mövcud müqavilənin klub üçün illik dəyərinin təxminən 50 milyon funt-sterlinq olduğu bildirilir.
Klubun kommersiya direktoru Ben Letti yeni tərəfdaşlığın xüsusi əhəmiyyət daşıdığını bildirib. Onun sözlərinə görə, “Liverpul” və “Turkish Airlines” arasında artıq 2005-ci ildən formalaşmış xüsusi əlaqələr var. Bu, “Liverpul”un İstanbulda keçirilən Çempionlar Liqasının finalında “Milan” üzərində qazandığı məşhur qələbəyə istinaddır.
Həmin finalda “Liverpul” ilk hissədən sonra 0:3 hesabı ilə geridə olsa da, ikinci hissədə üç qol vuraraq hesabı bərabərləşdirib və penaltilər seriyasında qalib gəlib. 2005-ci ildə İstanbulda keçirilən qarşılaşma klub tarixinin ən yaddaqalan oyunlarından biri hesab olunur.
Yeni müqavilə ilə “Turkish Airlines” “Liverpul”un tarixində əsas forma sponsoru kimi çıxış edəcək altıncı şirkət olacaq.
MONETAR.AZ
