Azərbaycanın rəqabət orqanı qlobal elektron ticarət platformalarından biri olan Temu ilə bağlı araşdırmaya başlayıb. Prezident yanında Antiinhisar və İstehlak Bazarına Nəzarət Dövlət Agentliyi platformanın sahibi olan PDD Holdings şirkəti barəsində iş qaldırıldığını açıqlayıb.
Agentliyin məlumatına görə, araşdırmanın səbəbi “Temu” platforması vasitəsilə həyata keçirilən qiymət siyasətinin rəqabət mühitinə təsiri ilə bağlı daxil olmuş müraciətdir. Qurum iddia edir ki, şirkət bazarda hökmran mövqedən sui-istifadə etməklə rəqabət qanunvericiliyinin tələblərini poza bilər. Hazırda araşdırma davam etdirilir.
Antiinhisar və İstehlak Bazarına Nəzarət Dövlət Agentliyi araşdırma zamanı Rəqabət Məcəlləsinin 16.2.1-ci, 16.2.7-ci və 16.2.8-ci maddələrinə istinad edib.
Rəqabət Məcəlləsinin 16-cı maddəsi ümumilikdə hökmran mövqedən sui-istifadə hallarını tənzimləyir. Maddənin 16.2-ci bəndi isə bazarda rəqabətin məhdudlaşdırılmasına səbəb olan və ya səbəb ola biləcək davranışları əhatə edir.
İstinad edilən maddələrin mahiyyəti belədir:
Maddə 16.2.1 – inhisar qiymətlərinin, o cümlədən bazarda rəqabətə mənfi təsir göstərə biləcək həddən artıq aşağı və ya yüksək qiymətlərin tətbiq edilməsinə aiddir.
Maddə 16.2.7 – rəqabəti məhdudlaşdıran aşağı qiymətlərin və ya rəqiblərin davamlı şəkildə rentabelli fəaliyyət göstərməsinə imkan verməyən qiymət siyasətinin həyata keçirilməsini nəzərdə tutur.
Maddə 16.2.8 – iqtisadi və ya texnoloji əsas olmadan məhsulların maya dəyərindən aşağı qiymətə satılması hallarını əhatə edir. Burada söhbət köhnəlmiş, istifadədən çıxarılmış və ya bazar dəyərini itirmiş mallardan getmir.
Başqa sözlə, araşdırmanın əsas istiqaməti Temu-nun aşağı qiymət siyasətinin adi rəqabət üstünlüyü, yoxsa rəqibləri bazardan sıxışdırmağa yönəlmiş strategiya olub-olmadığını müəyyənləşdirməkdir.
Son illərdə xarici elektron ticarət platformalarında satılan məhsulların aşağı qiymətləri Azərbaycanda yerli satıcılarla xarici platformalar arasında rəqabət məsələsini gündəmə gətirib.
Yerli şirkətlər dəfələrlə bildiriblər ki, beynəlxalq onlayn platformalar daha aşağı xərclər hesabına məhsulları daha ucuz təklif edə bilir və bu, daxili bazarda fəaliyyət göstərən satıcılar üçün əlavə təzyiq yaradır.
Xüsusilə geyim, elektronika, məişət əşyaları və müxtəlif gündəlik istehlak məhsulları seqmentində xarici platformaların qiymət üstünlüyü yerli biznes nümayəndələrinin diqqət mərkəzində olub.
Hazırda Agentliyin araşdırması yekunlaşmayıb. Buna görə də Temu və ya PDD Holdings tərəfindən rəqabət qanunvericiliyinin pozulub-pozulmadığı barədə yekun nəticə yoxdur.
Əgər pozuntu müəyyən edilərsə, qanunvericiliyə uyğun tədbirlər görülə bilər. Əks halda isə şirkətin qiymət siyasətinin sərbəst rəqabət çərçivəsində olduğu qənaətinə gəlinə bilər.
MONETAR.AZ
