ABŞ-ın texnologiya nəhəngi "Uber Technologies" Almaniyanın qida çatdırılması şirkəti "Delivery Hero"nun satın alınması barədə razılıq əldə edib. Tamamilə nağd vəsait hesabına maliyyələşdiriləcək sövdələşmədə şirkət 14,8 milyard dollar dəyərində qiymətləndirilir. Bu addım "Uber"in qlobal çatdırılma bazarında mövqeyini gücləndirmək və əsas rəqiblərindən biri olan "DoorDash" ilə rəqabətdə üstünlüyünü artırmaq məqsədi daşıyır.
Şirkətin açıqladığı məlumata görə, "Delivery Hero"nun səhmdarlarına hər səhm üçün 41,50 avro təklif olunub. Bu qiymət əvvəlki bağlanış məzənnəsi ilə müqayisədə 8,7% yüksəkdir və şirkətin ümumi bazar dəyərini 14,8 milyard dollar səviyyəsində qiymətləndirir. "Uber"in artıq sahib olduğu pay nəzərə alındıqda isə sövdələşmənin dəyəri təxminən 13,7 milyard dollar təşkil edir.
Tərəflər yekun satınalma sazişinin imzalandığını təsdiqləyiblər. Baş qərargahı Berlində yerləşən "Delivery Hero"nun əsas səhmdarlarından biri Niderlandın investisiya şirkəti "Prosus NV" hesab olunur.
Təklif olunan qiymət bazarda əvvəllər müzakirə edilən hər səhm üçün təxminən 40 avroluq qiymətlə müqayisədə daha yüksəkdir. Şirkətlər həftənin əvvəlində satınalma ilə bağlı danışıqlar apardıqlarını rəsmən təsdiqləmişdilər.
Hazırda "Uber" artıq "Delivery Hero"nun səsvermə hüququna malik səhmlərinin təxminən 24,8%-nə sahibdir. Bundan əlavə, törəmə maliyyə alətləri vasitəsilə şirkətin daha 11,7%-lik iqtisadi marağı mövcuddur ki, bu da satınalma prosesini asanlaşdıran əsas amillərdən biri hesab olunur.
Ekspertlər bu razılaşmanı qlobal qida çatdırılması sektorunda davam edən konsolidasiya prosesinin növbəti mərhələsi kimi qiymətləndirirlər. Pandemiyadan sonra bazarda artım tempinin zəifləməsi, əməliyyat xərclərinin yüksəlməsi və rəqabətin kəskinləşməsi iri şirkətləri birləşmələr və satınalmalar vasitəsilə miqyaslarını genişləndirməyə sövq edir.
Son illərdə bu istiqamətdə bir sıra iri sövdələşmələr həyata keçirilib. Belə ki, "DoorDash" ötən il "Deliveroo"nu satın almağa razılıq verib, "Prosus" isə "Just Eat Takeaway.com" üzərində nəzarəti ələ keçirib.
Yeni razılaşma "Uber"ə ABŞ-dan kənar bazarlarda fəaliyyətini daha da genişləndirmək imkanı verəcək. Hazırda "Delivery Hero" 60-dan çox ölkədə fəaliyyət göstərir və son dövrlərdə investorların aktivlərin satışına dair artan təzyiqi fonunda müxtəlif strateji variantları dəyərləndirirdi.
Bununla yanaşı, sövdələşmənin antiinhisar tənzimləyicilərinin ciddi araşdırmasına məruz qalacağı gözlənilir. Səbəb isə hər iki şirkətin Avropanın bir sıra ölkələrində və Yaxın Şərq bazarında oxşar fəaliyyət istiqamətlərinə malik olmasıdır.
MONETAR.AZ
