Rusiya dizelinin Braziliyaya tədarükü ilə bağlı təkliflər artıb. Bloomberg agentliyinin məlumatına görə, yüklərin bir hissəsini ABŞ-ın ən böyük neft-qaz qovşağına çatdırmaq planları ölkə daxilində Moskva ilə əməkdaşlığa qarşı siyasi müqavimətlə üzləşdikdən sonra Rusiya yanacağı Braziliyanın distribyutorlarına təklif olunmağa başlanıb.
Braziliyanın yanacaq idxalçılarını təmsil edən Abicom assosiasiyasının prezidenti Serjiu Araujunun sözlərinə görə, bu ay çatdırılmaq üçün Rusiya dizeli ilə yüklənmiş azı dörd tanker alıcılara təklif edilir.
Rusiya ilin əvvəlində Ukraynanın pilotsuz uçuş aparatları ilə həyata keçirdiyi hücumlar nəticəsində ölkənin neft emalı güclərinin əhəmiyyətli hissəsinin fəaliyyətinin pozulmasından sonra dizel ixracını kəskin azaltmışdı. Neft emalı həcmlərinin aşağı düşməsi xarici bazarlara yanacaq tədarükünü də məhdudlaşdırmışdı.
Hazırda isə ABŞ Prezidenti Donald Trampın sanksiyalara baxmayaraq müəyyən tədarüklərin bərpasına imkan verən icazəsindən sonra Rusiya dünya bazarlarına daha çox dizel çıxarmağa çalışır. Ötən ay verilən bu icazənin Ukraynadakı müharibə ilə bağlı hücumlar və İrandakı müharibə nəticəsində yaranmış qlobal yanacaq qıtlığını yumşaltmaq məqsədi daşıdığı bildirilir.
Lakin Rusiya yanacağının ABŞ-a çatdırılması hələ də hüquqi və siyasi maneələrlə üzləşir. Belə ki, icazənin Rusiya yanacağının idxalını qadağan edən 2022-ci il qanunu ilə ziddiyyət təşkil edə biləcəyi barədə narahatlıqlar fonunda indiyədək heç bir Rusiya yükü ABŞ sahillərinə çatmayıb.
Ötən həftə Nyu-Cersi ştatının qubernatoru Miki Şerrill liman operatorlarına və terminal sahiblərinə müraciət edərək Rusiya dizelini qəbul etməməyə çağırıb. O, belə tədarüklərin federal qanunvericiliyin pozulmasına səbəb ola biləcəyini bildirib. Nyu-Cersidə Nyu-York liman kompleksinin ən iri neft körpüləri və rezervuarlarının bir hissəsi yerləşir.
ABŞ bazarında yaranan çətinliklər Rusiya yanacağının alternativ istiqamətlərə yönəldilməsi ehtimalını artırır. Bu baxımdan Braziliya mühüm bazar hesab olunur. Ölkə Avstraliyadan sonra dünyanın ikinci ən böyük dizel idxalçısıdır və daxili tələbatının təxminən üçdə birini xarici tədarüklər hesabına ödəyir.
Vortexa şirkətinin məlumatlarına görə, Braziliyada dizelə tələbat adətən ilin dördüncü rübündə pik həddə çatır. Bu dövrdə yanacaqla işləyən yük maşınları gübrə daşımalarını artırır, fermerlər isə soya əkinləri üçün sahələrə çıxırlar.
Braziliyalı treyderlər ötən həftə onlara Rusiya dizelinin təklif edildiyini təsdiqləsələr də, qiymətlərin ABŞ istehsalı olan yanacaqla müqayisədə kifayət qədər cəlbedici olmadığını bildiriblər.
Bloomberg-in topladığı gömrük statistikasına əsasən, Braziliyada alıcı tapacağı təqdirdə, təklif olunan Rusiya dizelinin 1,1 milyon barellik həcmi ölkənin oktyabr ayında Rusiyadan idxal etdiyi yanacağın miqdarından təxminən iki dəfə çox olacaq.
Kpler analitik şirkətinin qiymətləndirməsinə görə, Rusiyanın Primorsk limanında dizel yükləyən Leruo, Cerrado, Primorye və Athina M tankerləri Braziliyaya doğru hərəkət edir. Bu gəmilərin istiqaməti Rusiya yanacağının ABŞ bazarında üzləşdiyi maneələr fonunda ixrac marşrutlarının dəyişə biləcəyinə işarə edir.
MONETAR.AZ
