Avropa Komissiyasının sədri Ursula fon der Leyen enerji təchizatında yaranan problemlərin qlobal bazarlara təsir etdiyini bildirərək təmiz enerjiyə keçidin sürətləndirilməsinə çağırıb. Onun sözlərinə görə, enerji təhlükəsizliyini gücləndirmək üçün ölkələr ənənəvi enerji mənbələrindən asılılığı azaltmalıdır.
Monetar.az xəbər verir ki, fon der Leyen bu fikirləri Türkiyənin Antalya şəhərində keçirilən BMT-nin İqlim Dəyişikliyi üzrə Çərçivə Konvensiyasının COP31 Liderlər Sammitində səsləndirib.
O bildirib ki, Hörmüz boğazı vasitəsilə enerji təchizatında yaranan fasilələr dünya enerji bazarlarında ciddi dalğalanmalara səbəb olur. İqlim böhranı ilə yanaşı, enerji təchizatındakı bu problemlər mövcud enerji modelinin risklərini də üzə çıxarır.
Fon der Leyen çıxışında Nepalda baş verən dağıdıcı daşqınları, Sudandan Mərkəzi Amerikayadək müxtəlif bölgələrdə müşahidə olunan quraqlıqları və Avropada qeydə alınan genişmiqyaslı meşə yanğınlarını da xatırladıb.
Avropa Komissiyasının sədri dünyanın elektrik enerjisi dövrünə daxil olduğunu bildirərək 2035-ci ilədək elektrik enerjisinin qlobal enerji istehlakındakı payının 35%-ə çatdırılmasını nəzərdə tutan Qlobal Elektrikləşmə Öhdəliyini dəstəklədiyini açıqlayıb.
Onun sözlərinə görə, elektrikləşmənin genişlənməsi həm istehlakçıların enerji xərclərini, həm də enerji istehsalı ilə bağlı emissiyaları azalda bilər.
Fon der Leyen qeyd edib ki, ötən il Avropa İttifaqında elektrik enerjisinin 70%-dən çoxu təmiz mənbələr hesabına istehsal olunub. Aİ-nin Elektrikləşmə Fəaliyyət Planına əsasən, 2040-cı ilədək yekun enerji istehlakında elektrik enerjisinin payının iki dəfə artırılaraq 46%-ə çatdırılması nəzərdə tutulur.
Fon der Leyen Avropa İttifaqının iqlim hədəflərinə də toxunub. Onun sözlərinə görə, birlik 2030-cu ilədək istixana qazı emissiyalarını yarıdan çox, 2040-cı ilədək isə 90% azaltmağı planlaşdırır. Bu hədəflər Avropanın 2050-ci ilədək iqlim baxımından neytral ilk qitəyə çevrilməsi strategiyasının tərkib hissəsidir.
Aİ rəhbəri bildirib ki, ötən il inkişaf etməkdə olan ölkələrə iqlim maliyyələşdirilməsi çərçivəsində 32 milyard avrodan çox vəsait ayrılıb. Bundan əlavə, Global Gateway təşəbbüsü vasitəsilə 300 milyard avrodan artıq dayanıqlı investisiyanın səfərbər edildiyi qeyd olunub.
