Dünya üzrə mis istehsalında Çili ilk sırada qərarlaşıb. 2025-ci ildə ölkədə 5,3 milyon ton mis hasil edilib ki, bu da qlobal istehsalın 23%-nə bərabərdir.
Monetar.az-ın ABŞ Geoloji Xidmətinin (USGS) 2026-cı il hesabatına əsaslanan araşdırmasına görə Konqo Demokratik Respublikası 3,2 milyon ton hasilatla ikinci, Peru isə 2,7 milyon tonla üçüncü yerdə qərarlaşıb.
İlk üçlükdə yer alan ölkələr dünya üzrə mis hasilatının təxminən 48,6%-ni təmin edib. Çili və Peru birlikdə qlobal istehsalın 34,7%-nə sahib olub.
Ən çox mis hasil edən 10 ölkə
2025-ci ilin nəticələrinə əsasən, dünya üzrə ən böyük mis istehsalçıları belə sıralanıb:
- Çili - 5,3 milyon ton
- Konqo Demokratik Respublikası - 3,2 milyon ton
- Peru - 2,7 milyon ton
- Çin - 1,8 milyon ton
- Rusiya - 1,3 milyon ton
- ABŞ - 1 milyon ton
- Zambiya - 940 min ton
- Avstraliya - 730 min ton
- İndoneziya - 710 min ton
- Qazaxıstan - 710 min ton
Dünya üzrə ümumi mis hasilatı 2025-ci ildə təxminən 23 milyon ton təşkil edib.
Araşdırmada diqqət çəkən məqamlardan biri Konqo Demokratik Respublikası və Zambiyanın hasilat göstəriciləridir. Bu iki Afrika ölkəsi birlikdə 2025-ci ildə 4,14 milyon ton mis istehsal edib. Bu göstərici Çin və ABŞ-ın ümumi hasilatından 1,34 milyon ton çoxdur.
Hər iki ölkə Mərkəzi Afrikada yerləşən və zəngin mis yataqları ilə tanınan Copperbelt bölgəsinin bir hissəsidir. Region son illərdə beynəlxalq dağ-mədən şirkətlərinin investisiyaları baxımından da əhəmiyyət qazanıb.
Mis elektrik şəbəkələri, sənaye avadanlıqları, elektrik avtomobilləri və məlumat mərkəzlərinin qurulmasında geniş istifadə olunur. Elektrik enerjisinə və infrastruktur layihələrinə tələbatın artması bu metalı qlobal iqtisadiyyat üçün strateji resurslardan birinə çevirir.
