Dünya bazarında alüminiumun qiyməti noyabrın 10-da ilin ən aşağı səviyyəsinə düşdükdən sonra yenidən artmağa başlayıb. Təchizatla bağlı yaranan çətinliklər qiymətlərin yüksəlməsinə təsir göstərib.
Monetar.az xəbər verir ki, Böyük Britaniyada alüminium fyuçerslərinin qiyməti ton üçün 3 050 dollara yüksəlib. Halbuki noyabrın 10-da qiymət 3 000 dollardan aşağı düşərək ilin minimum səviyyəsini sınaqdan keçirmişdi.
Qiymət artımına ABŞ-İran gərginliyi fonunda Körfəz Əməkdaşlıq Şurası ölkələrindəki istehsal mərkəzlərindən alüminium tədarükünün çətinləşməsi təsir edib. London Metal Birjasında (LME) yaxın müddətli müqavilələr arasındakı qiymət fərqi son beş ayın ən yüksək səviyyəsinə - ton üçün 94 dollara çatıb. Birjanın anbar ehtiyatları isə müharibədən əvvəlki səviyyənin təxminən yarısı qədərdir.
Bununla belə, Çində istehsalın yüksək olması alüminiumun dünya bazarındakı qiymət artımını məhdudlaşdırır. Çində ilkin alüminium istehsalına illik 45 milyon ton həcmində limit tətbiq edilməsi yerli şirkətləri Cənub-Şərqi Asiya və Afrika ölkələrində yeni istehsal gücləri yaratmağa yönəldib.
Mövcud layihələr başa çatdıqdan sonra bu ölkələrdə alüminium əridilməsi üzrə istehsal gücünün 15 milyon tondan çox artacağı gözlənilir. Bu istiqamətdə İndoneziya öndə gedir. Ölkədə yeni zavodların istifadəyə verilməsi ilkin alüminium istehsalını bu il 70%-dək artıra bilər.
