Reuters agentliyinin məlumatına görə, Ukraynanın Rusiya energetika infrastrukturuna endirdiyi zərbələr fonunda ölkədə yanacağa tələbatın artması nəticəsində iyulun sonunda Cənubi Koreyadan Rusiyaya təxminən 30 min ton neft məhsulu göndərilib.
Gəmilərin hərəkətini izləyən Kpler və Vortexa platformalarının məlumatlarına əsasən, qeyri-adi hesab olunan bu tədarük çərçivəsində Cənubi Koreyanın Ulsan limanında yüklənən neft məhsulları azı iki kiçik tanker vasitəsilə Rusiyanın Uzaq Şərq limanlarına yola salınıb.
Kpler-in məlumatına və ticarət mənbələrinin bildirdiyinə görə, tankerlərdən biri artıq Rusiyaya çatıb, lakin yük hələ boşaldılmayıb. Məsələ ilə tanış olan iki mənbənin sözlərinə görə, göndərilən məhsullar arasında dizel yanacağı da var. Mənbələrdən biri yükün tərkibinə aviasiya kerosininin də daxil olduğunu bildirib.
Ukrayna son aylarda Rusiyanın neft emalı və enerji infrastrukturuna zərbələri davam etdirir. Kiyev bu hücumların məqsədinin Rusiyanın hərbi əməliyyatları maliyyələşdirmək imkanlarını zəiflətmək olduğunu bildirir.
Bu şəraitdə Moskva dizel və benzin ixracına tətbiq olunan qadağanı gələn ilin yanvar ayınadək uzadıb. Bununla belə, hökumət məhdudiyyətlərin bir hissəsinin sentyabrın 1-dən etibarən yumşaldılacağını açıqlayıb. Rusiya ənənəvi olaraq neft məhsullarının xalis ixracatçısı hesab olunur və Qərb sanksiyalarından sonra əsas ixrac marşrutlarını Braziliya, Türkiyə və Qərbi Afrika bazarlarına yönəldib.
Reuters daha əvvəl Rusiyanın Cənubi Koreya vasitəsilə Yaponiya mənşəli ən azı 200 min barel aviasiya kerosini almağa hazırlaşdığı barədə məlumat vermişdi. Lakin sonradan bir neçə ticarət mənbəyi həmin tədarükün baş tutmadığını bildirib. Bundan sonra Tokio bəyan edib ki, Rusiyaya aviasiya kerosininin ixracına tətbiq olunan qadağa üçüncü ölkələr və ya dənizdə yükün başqa gəmiyə ötürülməsi yolu ilə həyata keçirilən tədarüklərə də şamil olunur.
Kpler-in məlumatına görə, Şimal-Şərqi Asiyadan Rusiyaya son qeydə alınmış analoji tədarük 2022-ci ilin fevralında baş verib. Həmin vaxt Cənubi Koreyanın Yosu limanından göndərilən 22 min barel aviasiya kerosini Rusiyanın Vladivostok limanına çatdırılmışdı.
MONETAR.AZ
