Yerli mənbələrin Reuters agentliyinə verdiyi məlumata görə, güclü neft ixracı və neft emalı zavodlarında (NEmZ) emal həcmlərinin bərpası sayəsində Rusiya iyul ayında neft və kondensat hasilatını iyunla müqayisədə sutkada təxminən 100 min barel artıraraq 9 milyon bareldən yuxarı səviyyəyə çatdırıb.
Neft və neft məhsullarının satışı Rusiya büdcəsinin əsas gəlir mənbələrindən biri olaraq qalır. Bu səbəbdən Moskva Qərb sanksiyalarına və NEmZ-lərə yönələn davamlı dron hücumlarına baxmayaraq, hasilatı və ixracı mümkün olan ən yüksək səviyyədə saxlamağa çalışır. Bununla belə, mənbələr avqust ayında iyul göstəricilərinin qorunmasının çətin görünəcəyini bildirirlər.
Rusiya 2023-cü ildən etibarən rəsmi neft hasilatı statistikalarını dərc etmir.
OPEK-in məlumatına əsasən, Rusiyada neft hasilatı iyun ayında may ayı ilə müqayisədə sutkada 61 min barel azalaraq 8,989 milyon bareldən 8,928 milyon barelə enib. Kartel 2025-ci il üzrə Rusiyanın orta gündəlik neft hasilatını 9,129 milyon barel səviyyəsində qiymətləndirib.
Rusiya Mərkəzi Bankının iyul ayında keçirilən faiz qərarı iclasının materiallarında qeyd olunurdu ki, ilin əvvəlində neft hasilatının azalmasına NEmZ-lərin zədələnməsi və ixrac məhdudiyyətləri səbəb olub. Hesabatda vurğulanırdı ki, ixraca yönəldilə biləcək əlavə neft həcmləri nəqliyyat və liman infrastrukturunun məhdud ötürmə qabiliyyəti ilə üzləşib.
Hələlik nə OPEK, nə də Rusiya Mərkəzi Bankı iyul ayı üzrə hasilata dair rəsmi qiymətləndirmə açıqlayıb.
Analitiklərin fikrincə, iyulun sonu və avqustun əvvəlində Rusiyanın neft emalı zavodlarına dron hücumlarının intensivləşməsi, eləcə də Qara dənizdə tanker çatışmazlığı mövcud artım tendensiyasını zəiflədə bilər. Mənbələrin sözlərinə görə, neftin daşınması və yerləşdirilməsi ilə bağlı yaranan çətinliklər hasilatın azaldılmasını zəruri edə bilər.
Sahə mənbələri bildirirlər ki, Rusiya avqust ayında qərb limanlarından neft ixracını iyul ayı ilə müqayisədə təxminən 4% artırmağı planlaşdırır. Bu artım əsasən neft emalı zavodlarında plandankənar dayanmalardan sonra ixraca yönəldilən əlavə həcmlər hesabına mümkün ola bilər.
Bununla belə, yeni dron hücumları bu planları dəyişə bilər. Son günlər bir neçə iri NEmZ zərbələrdən sonra fəaliyyətini müvəqqəti dayandırıb. Yaroslavl vilayətinin qubernatorunun məlumatına görə, cümə axşamı bölgədə yerləşən neft emalı zavodunda dron hücumundan sonra yanğın baş verib.
MONETAR.AZ
