Müasir dünyada güc anlayışı yalnız hərbi imkanlarla deyil, həm də iqtisadi alətlər, texnologiyalar, valyutalar, təchizat zəncirləri və kapital üzərində nəzarətlə ölçülür. Lakin futbol üzrə dünya çempionatı göstərdi ki, “yumşaq güc” də ölkələrin beynəlxalq nüfuzunda mühüm rol oynayır.
Beynəlxalq təhlillərə görə, turnir təkcə idman yarışı deyil, həm də ölkələrin dünyaya öz imicini təqdim etdiyi böyük platformadır. ABŞ, Kanada və Meksikanın ev sahibliyi etdiyi çempionatın əvvəlində əsas diqqət ev sahibi ölkələrin qlobal nüfuzunu artırmaq imkanlarına yönəlmişdi.
Turnir zamanı müxtəlif ölkələrin azarkeşləri və futbolçuları vasitəsilə mədəni əlaqələr, milli imic və ictimai diplomatiya ön plana çıxıb. Lakin bəzi siyasi mübahisələr və hadisələr ABŞ-ın yumşaq gücü ilə bağlı suallar yaradıb.
Analitiklər hesab edir ki, İspaniya yığmasının çempionluq qazanması ölkənin beynəlxalq nüfuzuna da təsir edib. Finalın dünyanın böyük hissəsi tərəfindən izlənilməsi İspaniyanın mədəni təsir imkanlarını artıran amil kimi qiymətləndirilir.
Çempionat eyni zamanda digər geosiyasi mesajlar da verib. İngiltərə və Argentina arasındakı qarşılaşmalar tarixi ərazi mübahisələrinin, xüsusilə Folklend adaları məsələsinin hələ də siyasi yaddaşda qalmaqda olduğunu göstərib. Kiçik dövlətlərin uğurları isə böyük ölkələr qarşısında belə təsir imkanlarının olduğunu nümayiş etdirib.
Mütəxəssislərin fikrincə, turnirin əsas dərslərindən biri insan kapitalının əhəmiyyətidir. Aparıcı komandaların uğuru müxtəlif ölkələrdən gələn futbolçuların, miqrantların və qlobal idman sistemində yetişən istedadların hesabına mümkün olub.
Beləliklə, dünya çempionatı göstərib ki, müasir dövrdə güc yalnız iqtisadi və hərbi üstünlüklərlə məhdudlaşmır. Mədəniyyət, idman, insan kapitalı və beynəlxalq imic də ölkələrin qlobal təsir imkanlarının mühüm hissəsinə çevrilir.
MONETAR.AZ
