Avrozonada inflyasiyanın gözləniləndən daha uzun müddət yüksək səviyyədə qalması ehtimalı artır. Buna səbəb enerji daşıyıcılarının qiymətlərində yeni artım dalğasının mal və xidmətlərin qiymətlərinə əlavə təzyiq yaratmasıdır.
Avropa Mərkəzi Bankının (AMB) baş iqtisadçısı Filip Leyn “Le Temps” qəzetinə müsahibəsində bildirib ki, hazırda qiymət artımının ikinci dalğası müşahidə olunur. Onun sözlərinə görə, bu dəfə təkcə neft deyil, təbii qazın qiymətindəki yüksəliş də inflyasiyanın dinamikasına təsir göstərir.
Leyn qeyd edib ki, enerji qiymətlərindəki yeni artım dalğası inflyasiyanın daha yüksək və davamlı xarakter almasına səbəb ola bilər. Onun sözlərinə görə, inflyasiyanın yalnız 2027-ci ilin ortalarından etibarən AMB-nin hədəf səviyyəsinə doğru enməyə başlaması gözlənilir.
AMB rəsmisinin fikrincə, enerji qiymətlərindəki yüksəliş ərzaq, elektrik enerjisi və digər malların qiymətlərinə yuxarı istiqamətdə təzyiq göstərə bilər. Bununla yanaşı, xidmət sektorunda qiymət təzyiqinin nisbətən mülayim qalacağı gözlənilir.
Enerji bazarlarında baş verən dəyişikliklər fonunda AMB artıq faiz dərəcələrini iki dəfə artırıb. Bank rəsmilərinin son açıqlamaları isə monetar siyasətin daha da sərtləşdirilə biləcəyi ehtimalını gündəmdə saxlayır. Bu çərçivədə oktyabr ayında faiz dərəcəsinin daha 25 baza bəndi artırılması ehtimalı da müzakirə olunur.
Yaxın perspektivdə avrozonada inflyasiyanın 4 faiz ətrafında olacağı gözlənilir. AMB-nin son proqnozlarına əsasən, inflyasiyanın cari ildə 3 faiz, gələn il isə 2,5 faiz təşkil edəcəyi gözlənilir. Bu göstəricilər bankın 2 faizlik inflyasiya hədəfindən yüksəkdir.
Filip Leyn iqtisadi artım üçün risklərin də artdığını bildirib. Onun sözlərinə görə, payız aylarında daha intensiv və uzunmüddətli enerji şoku Avropa iqtisadiyyatına əlavə təzyiq göstərə bilər.
Bununla belə, AMB-nin baş iqtisadçısı daha yumşaq ssenarinin mümkün olduğunu qeyd edib. O bildirib ki, enerji şokunun daha ciddi xarakter almaması halında Avropanın ayrı-ayrı ölkələrində dövlət xərclərinin artması iqtisadi fəallığı dəstəkləyə bilər. Bu baxımdan Almaniyada infrastruktur və müdafiə sahələrinə investisiya proqramları, eləcə də Avropa İttifaqının “NextGenerationEU” planı iqtisadi artım üçün mühüm amillər kimi qiymətləndirilir.
Leyn süni intellekt sektorunun da iqtisadiyyata mümkün töhfəsinə diqqət çəkib. Onun sözlərinə görə, süni intellekt sahəsində fəaliyyətin əsas ağırlıq mərkəzi Avropada olmasa da, regionda bu texnologiyalardan iqtisadi fayda əldə edə biləcək kifayət qədər aktiv şirkətlər mövcuddur.
AMB-nin baş iqtisadçısı ümumi iqtisadi mənzərəni ehtiyatlı nikbinliklə qiymətləndirib. Onun sözlərinə görə, baza ssenarisi enerji şokunun daha da güclənməyəcəyi təqdirdə Avropa iqtisadiyyatının sabit, lakin mülayim templə böyüməyə davam edəcəyini nəzərdə tutur.
MONETAR.AZ
