ABŞ Federal Ehtiyat Sisteminin (FED) Dallas Federal Ehtiyat Bankının prezidenti Lori Loqan inflyasiyanın azaldılması üçün faiz dərəcələrinin ən azı daha iki dəfə 0,25 faiz bəndi artırılmasının zəruri olduğunu bildirib. Onun fikrincə, qiymət təzyiqlərinin iqtisadiyyatda uzunmüddətli xarakter almasının qarşısını almaq üçün mərkəzi bank daha operativ hərəkət etməli ola bilər.
Loqan bu fikirləri Dallas və Kanzas-Siti Federal Ehtiyat banklarının təşkil etdiyi enerji konfransında səsləndirib. O, inflyasiyanın hələ də qəbuledilməz səviyyədə qaldığını vurğulayıb.
Rəsminin sözlərinə görə, oktyabr ayında ərzaq və enerji məhsulları nəzərə alınmadan istehlak qiymətləri 0,3% artıb. Bu dinamika davam edərsə, illik inflyasiya 4%-i keçə bilər. Bu isə FED-in şəxsi istehlak xərcləri indeksi (PCE) üzrə müəyyən etdiyi 2%-lik hədəfdən xeyli yüksəkdir.
Açıq Bazar Əməliyyatları üzrə Federal Komitə (FOMC) sentyabr ayında faiz dərəcəsini 0,25 faiz bəndi artırıb, oktyabrda isə dəyişiklik etməyib. Loqan hər iki qərarı dəstəklədiyini bildirib.
Onun fikrincə, faizlərin mərhələli şəkildə artırılması ev təsərrüfatlarına, biznes subyektlərinə və maliyyə bazarlarına yeni şərtlərə uyğunlaşmaq üçün imkan yaradır. Eyni zamanda, bu yanaşma iqtisadi fəallığın həddindən artıq zəifləməsi riskini azalda bilər.
Bununla belə, Loqan faiz artımlarının tempinin qısamüddətli iqtisadi və maliyyə şəraitindən asılı olacağını qeyd edib. O, qarşıdakı qış aylarında FES-in bu payızla müqayisədə daha sürətli addımlar ata biləcəyini istisna etməyib.
Loqanın sözlərinə görə, inflyasiya yalnız hərbi əməliyyatlar və ya tariflər səbəbindən enerji təchizatında yaranan fasilələrlə bağlı deyil. Qiymət artımına təsir edən daha geniş iqtisadi tendensiyalar da mövcuddur və bu amillər ilkin şoklar aradan qalxdıqdan sonra belə qüvvədə qala bilər.
O hesab edir ki, məşğulluq və inflyasiya ilə bağlı risklər arasında tarazlıq yaratmaq üçün daha sərt pul-kredit siyasətinə ehtiyac yaranacaq. Loqan xüsusilə inflyasiyanın hədəf səviyyədən uzun müddət yüksək qalmasının təhlükəsinə diqqət çəkib.
Onun fikrincə, qiymət artımı nə qədər uzun müddət davam edərsə, onun iqtisadiyyat iştirakçılarının gözləntilərində və davranışlarında möhkəmlənməsi ehtimalı bir o qədər yüksəlir. Buna görə də inflyasiyanın cilovlanması istiqamətində vaxtında tədbirlərin görülməsi vacibdir.
Qeyd edək ki, FED-in pul-kredit siyasəti ilə bağlı növbəti iclası dekabrın 8-9-da keçiriləcək. Həmin toplantıda faiz dərəcələrinin gələcək istiqaməti ilə bağlı qərar veriləcək.
MONETAR.AZ
