Yunanıstanda illik inflyasiya sürətlənərək oktyabr ayında 5,7%-ə çatıb. Sentyabrda bu göstərici 5,1% təşkil edib.
Ölkənin Milli Statistika Xidməti ELSTAT-ın çərşənbə axşamı açıqladığı məlumatlara əsasən, istehlak qiymətləri oktyabrda aylıq müqayisədə 0,4% artıb.
Ən yüksək qiymət artımlarından biri mənzil-kommunal xərclər üzrə qeydə alınıb. Belə ki, mənzil, su, elektrik enerjisi, qaz və digər yanacaq növlərinin qiymətləri ötən ilin eyni ayı ilə müqayisədə 14,2% yüksəlib. Qida məhsulları və alkoqolsuz içkilər isə illik ifadədə 1,7% bahalaşıb.
ELSTAT-ın açıqladığı göstəricilər Avropa İttifaqına üzv ölkələrdə qiymət dəyişikliklərinin müqayisəli şəkildə ölçülməsi üçün istifadə olunan harmonikləşdirilmiş istehlak qiymətləri indeksinə əsaslanır.
Statistika qurumu, həmçinin Yunanıstanda baza istehlak inflyasiyasının da yüksəldiyini bildirib. Oktyabrda bu göstərici 5,7%-ə çatıb. Sentyabrda isə 5,0% səviyyəsində olub.
MONETAR.AZ
