"Google" masaüstü kompüter istifadəçiləri üçün süni intellektə çıxışı asanlaşdıran Windows əməliyyat sistemi üçün Gemini tətbiqini istifadəyə verib. Tətbiq Windows 10 və Windows 11 istifadəçiləri üçün bütün dünyada əlçatandır.
Yeni tətbiq istifadəçilərə Alt + Space düymə kombinasiyası vasitəsilə Gemini-ni dərhal aktivləşdirmək imkanı yaradır. Süni intellekt aktiv pəncərənin üzərində açılır və tətbiqlər arasında keçid etmədən sənədlərdə faktların yoxlanılması, mətnlərin hazırlanması və təqdimatlar üçün ideyaların yaradılması kimi tapşırıqları yerinə yetirə bilir.
Tətbiq, həmçinin Gemini Spark adlı fərdi süni intellekt agentinə çıxış təqdim edir. Sistem Gmail və Google Drive kimi Google xidmətlərindən məlumat toplayaraq çoxmərhələli tapşırıqları yerinə yetirə, layihələr üzrə xülasələr hazırlaya və istifadəçilərə xüsusi ayrılmış iş mühitində çalışma imkanı yarada bilir.
Bundan əlavə, Windows üçün Gemini tətbiqi şəkil və video yaradılması funksiyalarını da dəstəkləyir. İstifadəçilər Nano Banana modeli vasitəsilə şəkillər yarada, Gemini Omni vasitəsilə isə birbaşa masaüstü kompüterdən yüksək keyfiyyətli videolar hazırlaya bilərlər.
"Google" bildirir ki, tətbiq kompüterin məhsuldarlığına mənfi təsir göstərmədən işləyir və gələcək yeniləmələrdə Windows üçün yerli (native) funksiyaların daha da genişləndirilməsi planlaşdırılır.
Tətbiqi gemini.google/desktop ünvanından yükləmək mümkündür.
MONETAR.AZ
