“Goldman Sachs” Silikon Vadisinə süni intellektə (Sİ) həsr olunmuş üçüncü illik səfərinin yekunlarına dair hesabatını dərc edib. Bank hesabatda süni intellektin biznes və informasiya xidmətləri sektorunda fəaliyyət göstərən şirkətlərə təsirini təhlil edib.
Araşdırma çərçivəsində investisiya bankının nümayəndələri Sİ sahəsində çalışan şirkətlər, vençur fondları və akademik tədqiqatçılarla görüşərək texnologiyanın analitik əhatə dairəsində olan şirkətlərə mümkün təsirlərini qiymətləndiriblər. Görüşlərin nəticələrinə əsasən “Goldman Sachs” dörd əsas qənaətə gəlib.
Birincisi, süni intellektin geniş yayılması fonunda şirkətlərə məxsus unikal (proprietary) məlumatların strateji əhəmiyyəti daha da artacaq. İkincisi, Sİ tətbiqləri artıq sadəcə informasiya təqdim etməkdən çıxaraq iş proseslərinin avtomatlaşdırılmasına doğru inkişaf edir. Üçüncüsü, fiziki xidmətlər göstərən şirkətlər və təhsil platformaları ofis işçilərinin sayından asılı biznes modelləri ilə müqayisədə daha dayanıqlı mövqedə görünür. Dördüncüsü isə monetizasiya modelləri şaxələnir: ənənəvi abunə və istifadəçi əsaslı qiymətqoyma ilə yanaşı, istifadəyə görə ödəniş, tranzaksiya haqları, əlavə məhsul və xidmətlər, eləcə də əldə olunan nəticəyə əsaslanan ödəniş modelləri sürətlə yayılır.
Bankın qiymətləndirməsinə görə, şirkətlərin rəqabət üstünlüyü gələcəkdə əsasən üç amildən asılı olacaq: unikal məlumat bazasına malik olmaları, əsas biznes proseslərinə nəzarət etmələri və süni intellektin yaratdığı əlavə istifadəçi aktivliyini gəlirə çevirmək bacarıqları.
“Goldman Sachs” analitik əhatə dairəsində olan bir sıra şirkətləri nümunə kimi göstərib. Bank hesab edir ki, “Daloopa”nın məlumat bazaları ilə inteqrasiya olunmuş maliyyə iş proseslərinin inkişafı “FactSet Research Systems” və “S&P Global” üçün yeni imkanlar yarada bilər. Hüquq texnologiyaları sahəsində isə “Harvey” və “Clio” platformalarının genişlənməsi “Thomson Reuters” üçün rəqabət mühitini dəyişə bilər. Sığorta sektorunda fəaliyyət göstərən “Verisk Analytics” isə Sİ əsaslı “Corgi” platformasının təsirini hiss edə bilər.
Hesabatda “Moody’s” şirkətinin əlaqələndirilmiş intellekt (connected intelligence) sistemi də xüsusi qeyd olunub. Bank bu modeli agent əsaslı giriş imkanları və iş proseslərinin avtomatlaşdırılması vasitəsilə unikal məlumatların kommersiyalaşdırılmasının uğurlu nümunəsi kimi qiymətləndirir.
“Goldman Sachs” hesab edir ki, süni intellektin şirkətlərin maliyyə nəticələrinə və səhmlərinin dinamikasına təsiri eyni olmayacaq. Bu təsir, ilk növbədə, məlumatlara kimin sahib olmasından, iş proseslərinə kimin nəzarət etməsindən, biznes modelinin texnoloji dəyişikliklərə nə dərəcədə həssas olmasından və şirkətin Sİ tətbiqini ölçülə bilən gəlir artımına çevirmək bacarığından asılı olacaq.
MONETAR.AZ
