Hər il iyulun 28-i Birləşmiş Millətlər Təşkilatının Ümumdünya Səhiyyə Təşkilatının (ÜST) təşəbbüsü ilə Ümumdünya Hepatit Günü kimi qeyd olunur.
Monetar.az xəbər verir ki, bu günün əsas məqsədi virus hepatitləri ilə bağlı ictimai məlumatlılığı artırmaq, xəstəliyin profilaktikası, erkən diaqnostikası və müalicəsinin əhəmiyyətini diqqətə çatdırmaqdır.
Mütəxəssislərin bildirdiyinə görə, hepatit qaraciyərin iltihabı ilə xarakterizə olunan xəstəlikdir və vaxtında aşkar edilmədikdə sirroz, qaraciyər çatışmazlığı və qaraciyər xərçəngi kimi ciddi fəsadlara səbəb ola bilər.
ÜST virus hepatitlərinin qarşısının alınması üçün peyvəndlənmənin, təhlükəsiz tibbi xidmətlərdən istifadənin, gigiyena qaydalarına əməl olunmasının və mütəmadi tibbi müayinələrin vacibliyini vurğulayır.
Ümumdünya Hepatit Günü münasibətilə dünyanın müxtəlif ölkələrində maarifləndirici kampaniyalar, tibbi müayinələr və məlumatlandırma tədbirləri təşkil olunur. Məqsəd virus hepatitlərinin aradan qaldırılması istiqamətində qlobal səyləri gücləndirmək və insanların sağlamlığına daha məsuliyyətlə yanaşmasını təşviq etməkdir.
