Avstraliya hökuməti 16 yaşdan kiçik uşaqların sosial şəbəkələrdən istifadəsinə qoyulan qadağanı müdafiə etməyə davam edir. Bu mövqe internet təhlükəsizliyi üzrə tənzimləyici qurumun açıqladığı məlumatlarla ziddiyyət təşkil edir. Belə ki, qadağanın qüvvəyə minməsindən üç ay sonra belə, 10–15 yaşlı yeniyetmələrin 80%-dən çoxunun sosial platformalardan aktiv istifadə etdiyi müəyyən edilib.
Avstraliya uşaqların ruhi və fiziki sağlamlığının qorunmasını əsas gətirərək 10 dekabr 2024-cü ildə dünyada analoqu olmayan bu məhdudiyyəti tətbiq edib. Qanun digər ölkələr tərəfindən diqqətlə izlənilir, ABŞ-də yerləşən iri texnologiya şirkətləri (Big Tech) isə təşəbbüsü kəskin tənqid edirlər.
Avstraliyanın məhsuldarlıq, rəqabət, xeyriyyəçilik və maliyyə məsələləri üzrə nazir köməkçisi Endryu Li bildirib ki, qadağa valideynlərin uşaqların internetdən istifadəsinə münasibətini dəyişib və milyonlarla hesabın bağlanmasına səbəb olub.
Onun sözlərinə görə, hökumət heç vaxt qaydalara 100% əməl olunacağını gözləməyib. Li bunu spirtli içkilərin satışı üçün müəyyən edilmiş minimum yaş həddi ilə müqayisə edərək qeyd edib ki, qanun pozuntularının mövcudluğu belə qaydaların tətbiqini mənasız etmir.
"Spirtli içkilərlə bağlı qanunlarda olduğu kimi, burada da pozuntuların olacağını bilirdik. Lakin bu, belə standartların müəyyən edilməsinin vacibliyini azaltmır", — deyə Endryu Li bildirib.
Avstraliyanın internet təhlükəsizliyi üzrə tənzimləyicisi eSafety-nin məlumatlarına əsasən, mart ayında 10–15 yaşlı uşaqlar sosial şəbəkələrdən qadağadan əvvəlki dövrlə demək olar ki, eyni intensivlikdə istifadə ediblər.
Araşdırma həmçinin göstərib ki, valideynlər uşaqlarının onlayn fəaliyyəti barədə əvvəlkindən daha az məlumatlı olublar. Bu isə yaş məhdudiyyətlərinin geniş istifadə olunan rəqəmsal platformalarda effektiv tətbiqinin nə qədər mürəkkəb olduğunu bir daha nümayiş etdirir. Nəticələr eSafety-nin mart ayında açıqladığı ilkin qiymətləndirmə ilə də üst-üstə düşür.
Bu səbəbdən Avstraliya hökuməti qaydalara əməl olunmasına nəzarəti daha da gücləndirməyi planlaşdırır. Təklif olunan dəyişikliklərə əsasən, yaş məhdudiyyətlərinin icrasını təmin etməyən texnologiya şirkətləri üçün maksimal cərimələrin iki dəfə artırılması nəzərdə tutulur.
Qanunvericiliyə görə, azyaşlıların sosial platformalarda hesab açmasının qarşısını almaq məsuliyyəti birbaşa platformaların üzərinə düşür. Qaydalarda nə uşaqlar, nə də onların valideynləri üçün birbaşa inzibati və ya maliyyə sanksiyaları nəzərdə tutulmur.
MONETAR.AZ
