"Bloomberg"in məlumatına görə, Commerzbankın baş icraçı direktoru Bettina Orlopp avqustun əvvəlində UniCredit rəhbərliyi ilə danışıqlar aparmağı planlaşdırır. Buna səbəb İtaliya bankının Almaniyanın ikinci ən böyük kredit təşkilatlarından biri üzərində nəzarəti ələ keçirməyə yaxınlaşmasıdır.
Məlumata görə, Commerzbankın ikinci rüb üzrə maliyyə nəticələrinin açıqlanmasından dərhal sonra keçirilməsi planlaşdırılan videokonfrans bankın gələcək idarəetmə modeli və korporativ strukturu ilə bağlı müzakirələrə təkan verə bilər. Danışıqların bir neçə ay davam edəcəyi gözlənilir.
UniCredit tender təklifi vasitəsilə, demək olar ki, əlavə mükafat (premium) ödəmədən Commerzbankın təxminən 18%-lik səhm paketini əldə edib. Törəmə maliyyə alətləri (derivativlər) və Commerzbankın səhmlərinin geri alınmasının təsiri nəzərə alındıqda, İtaliya bankının payının 50%-ə çata biləcəyi bildirilir.
Belə bir pay UniCreditə bütün səhmdarların iştirak etmədiyi ümumi yığıncaqlarda faktiki səs çoxluğu qazandıra və baş icraçı direktor Andrea Orçelə idarəetmə və strategiya ilə bağlı mühüm qərarlar qəbul etmək imkanı verə bilər.
Bununla belə, Commerzbank hesab edir ki, xüsusilə minoritar səhmdarlar, əməkdaşlar və bank rəhbərliyi planlaşdırılan dəyişikliklərə qarşı çıxacağı halda, UniCreditin əsas struktur dəyişikliklərini həyata keçirməsi üçün səhmdarların 75%-nin dəstəyinə ehtiyacı olacaq.
Bettina Orlopp iki bank arasında dostluq əsasında razılaşmanın əldə olunacağına ümid etdiyini bildirib. Onun əsas prioritetləri sırasında Commerzbankın beynəlxalq fəaliyyətinin qorunması, bankın birjada müstəqil listinqinin saxlanılması və UniCreditin təklifini qəbul etməyən səhmdarların maraqlarının müdafiəsi yer alır.
Məlumata görə, Andrea Orçel Commerzbankın beynəlxalq şəbəkəsinin və arxa ofis (back-office) əməliyyatlarının optimallaşdırılması hesabına təxminən 1,4 milyard avro xərc qənaətinə nail olmağı hədəfləyir. Commerzbank isə öz növbəsində 2030-cu ilə qədər mənfəəti iki dəfə artırmaq strategiyası çərçivəsində təxminən 3 000 iş yerinin ixtisar ediləcəyini açıqlayıb.
Commerzbankın səhmlərinin 12%-dən çoxuna sahib olan Almaniya hökuməti və əməkdaşların nümayəndələri Bettina Orloppa dəstəklərini davam etdirirlər. Bloomberg qeyd edir ki, Berlin əvvəllər mümkün satınalmaya qarşı çıxsa da, son vaxtlar bu məsələdə daha yumşaq mövqe nümayiş etdirməyə başlayıb.
Tam satınalma baş tutacağı təqdirdə, bu sövdələşmə Avropanın bank sektorunda son iyirmi ilin ən iri birləşmələrindən biri olacaq. Bu addım UniCreditin Almaniya və Polşadakı mövqeyini daha da gücləndirə və Avropa bank sektorunda konsolidasiya prosesini sürətləndirə bilər.
Məlumata görə, UniCredit nəzarəti əldə etdikdən sonra Commerzbankı ən azı iki il müstəqil şəkildə idarə etməyi, yalnız bundan sonra Almaniyadakı HVB törəmə bankı ilə mümkün inteqrasiya variantlarını nəzərdən keçirməyi planlaşdırır.
MONETAR.AZ
