Səudiyyə Ərəbistanının Dövlət İnvestisiya Fondu (PIF) və investorlar qrupunun videooyun istehsalçısı Electronic Arts şirkətini 55 milyard dollara satın alması Avropa İttifaqından son tənzimləyici təsdiqi alıb.
Avropa Komissiyasının sənədlərinə əsasən, sövdələşmə Aİ-nin Xarici Subsidiyalar Reqlamenti çərçivəsində də təsdiqlənib. Bu qərar sazişin tamamlanması yolunda son əsas maneələrdən biri hesab olunurdu.
Electronic Arts dünən tənzimləyiciyə təqdim etdiyi sənəddə bildirib ki, iyulun 30-na olan vəziyyətə görə bütün zəruri tənzimləyici razılıqlar əldə olunub. Şirkət sövdələşmənin avqustun 4-də bağlanacağını gözləyir.
Bundan əvvəl saziş Avropa İttifaqının antiinhisar qaydaları çərçivəsində də təsdiqlənmişdi. Bununla belə, Xarici Subsidiyalar Reqlamenti üzrə araşdırma daha ciddi hüquqi mərhələ hesab edilirdi.
Sözügedən reqlament Avropa İttifaqına üzv olmayan dövlətlərin maliyyə dəstəyi hesabına fəaliyyət göstərən şirkətlərin Aİ bazarında rəqabəti pozacaq şəkildə şirkətlər əldə etməsinin qarşısını almaq məqsədi daşıyır.
Electronic Arts-ın alınması Səudiyyə Ərəbistanının Dövlət İnvestisiya Fondunun qlobal oyun və e-idman sənayesində mövqeyini gücləndirmək strategiyasının mühüm hissəsi kimi qiymətləndirilir.
Fond hesab edir ki, videooyun bazarı uzunmüddətli tənəzzüldən sonra bərpa mərhələsinə daxil olur və iri oyun franşizaları gələcəkdə yüksək dəyər yaratmaq potensialına malikdir.
MONETAR.AZ
