Dövlət İmtahan Mərkəzi (DİM) dövlət qulluqçularının peşəkar bilik və bacarıqlarının artırılması məqsədilə ölkənin müxtəlif bölgələrində təlimlər təşkil edir. Tədbirlər 2022–2026-cı illərdə sosial-iqtisadi inkişaf Strategiyasının icrası çərçivəsində həyata keçirilir.
Belə ki, Azərbaycan Respublikası Prezidentinin 2022-ci il 22 iyul tarixli 3378 nömrəli Sərəncamı ilə təsdiq edilmiş “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nın 1–3-cü bəndlərində nəzərdə tutulan tədbirlər üzrə DİM əsas icraçı qurum kimi müəyyən edilib. Bu istiqamətdə Mərkəz tərəfindən 2026-cı ilin sonunadək ölkənin inzibati ərazi bölgüsünə uyğun olaraq bütün regionlarda dövlət qulluqçuları üçün təlimlərin keçirilməsi planlaşdırılıb.
Noyabrın 11-də başlayan növbəti təlimlər noyabrın 13-dək İmişli, Füzuli və Beyləqan rayonlarını əhatə edəcək.
Təlimlər çərçivəsində DİM əməkdaşları dövlət qulluqçularına “Dövlət qulluğunda vakant inzibati vəzifələrin idarə edilməsi”, “Ünsiyyət bacarıqlarının inkişafı” və “Cəmiyyətə xidmət psixologiyası: dövlət qulluqçusunun daxili motivasiyası” mövzularında məlumat veriblər.
Görüşlər zamanı təqdim olunan mövzular ətrafında müzakirələr aparılıb, iştirakçıları maraqlandıran suallar cavablandırılıb.
Qeyd edək ki, dövlət qulluqçuları üçün nəzərdə tutulan təlimlər 2026-cı ilin sonunadək Azərbaycanın digər şəhər və rayonlarında da davam etdiriləcək.
