PISA 2025 nəticələrinə əsasən, 90 təhsil sistemi üzrə qızların oxu bacarıqları üzrə orta nəticəsi 89 sistemdə oğlanlardan yüksək olub. Yalnız Ruandada oğlanlar qızları 6 bal qabaqlayıb.
Monetar.az xəbər verir ki, OECD-nin PISA 2025 qiymətləndirməsində 15 yaşlı şagirdlərin oxu, riyaziyyat və təbiət elmləri üzrə bilik və bacarıqları ölçülüb. Nəticələr oxu sahəsində qızlarla oğlanlar arasında nəzərəçarpan fərq olduğunu göstərib.
OECD ölkələri üzrə orta nəticədə qızlar 476 bal, oğlanlar isə 446 bal toplayıb. Beləliklə, qızların göstəricisi oğlanlardan orta hesabla 30 bal yüksək olub.
Ən böyük fərqlərdən biri Finlandiyada qeydə alınıb. Burada qızların orta nəticəsi 498 bal, oğlanların nəticəsi isə 452 bal olub. Fərq 46 bal təşkil edib.
Litvada qızlar 486, oğlanlar 442 bal, İsveçdə isə müvafiq olaraq 487 və 447 bal toplayıb. Polşada da fərq 37 bal olub.
Asiya ölkələri arasında Tayvanda qızların nəticəsi 528 bal, oğlanların nəticəsi 489 bal olub. Cənubi Koreyada bu göstəricilər 515 və 487 bal, Sinqapurda isə 548 və 522 bal təşkil edib.
ABŞ-da qızların orta oxu nəticəsi 501 bal, oğlanların nəticəsi isə 477 bal olub. Böyük Britaniyada isə göstəricilər müvafiq olaraq 501 və 488 bal təşkil edib.
OECD məlumatlarına görə, 2022-2025-ci illərdə oğlanların orta oxu nəticəsi 17 bal, qızların nəticəsi isə 12 bal azalıb. Nəticədə qızlarla oğlanlar arasındakı fərq 5 bal genişlənib.
OECD ölkələrində oğlanların 37 faizi oxu üzrə baza səviyyəsinə çata bilməyib. Qızlarda isə bu göstərici 25 faiz olub. Ən yüksək nəticə göstərənlər arasında da fərq müşahidə edilib: qızların 7 faizi, oğlanların isə 5 faizi oxu üzrə 5-ci və daha yüksək səviyyəyə çatıb.
Mütəxəssislərin araşdırmalarında oxuya maraq və özünəinam kimi amillərin də bu fərqlə əlaqəli ola biləcəyi qeyd olunur. Bununla belə, PISA nəticələri fərqin konkret səbəbini müəyyən etmir.
