Asiya valyutaları bu gün müxtəlif istiqamətlərdə hərəkət edib. ABŞ dolları isə investorların Federal Ehtiyat Sisteminin (FES) gələcək addımları ilə bağlı ipucu verəcək əsas inflyasiya göstəricisini – Şəxsi İstehlak Xərcləri İndeksini (PCE) gözləməsi fonunda dar diapazonda ticarət olunub. Günün əsas qalibi isə gözləniləndən yüksək inflyasiya göstəricilərinin dəstəklədiyi Avstraliya dolları olub.
Moskva vaxtı ilə saat 07:28-ə olan məlumata görə, ABŞ dollarının əsas valyutalara qarşı məzənnəsini ölçən Dollar İndeksi (DXY) 0,1% artaraq 98,99 bəndə yüksəlib. Bununla belə, indeks ötən həftə qeydə alınmış son üç ayın minimum səviyyəsinə yaxın qalmaqdadır.
Bazar iştirakçıları diqqətlərini həftənin sonuna planlaşdırılan Cekson-Houl iqtisadi simpoziumuna və çərşənbə günü açıqlanacaq PCE inflyasiya göstəricisinə yönəldiblər. Məhz bu göstərici FES-in inflyasiyanı qiymətləndirərkən üstünlük verdiyi əsas indikator hesab olunur və faiz dərəcələri ilə bağlı növbəti qərarlara təsir göstərə bilər.
Analitiklərin fikrincə, ABŞ-də dövlət borcunun sürətlə artması və mərkəzi bankın müstəqilliyi ilə bağlı narahatlıqlar fonunda açıqlanacaq inflyasiya məlumatları bazarlar üçün xüsusi əhəmiyyət daşıyır.
ABŞ Maliyyə Nazirliyinin dövlət istiqrazlarının geri alınması proqramını genişləndirməsi uzunmüddətli istiqraz gəlirlilikləri üzərindəki təzyiqi müəyyən qədər azaldıb. Lakin ekspertlər hesab edirlər ki, bu addım dövlət borcunun artımı və onun maliyyələşdirilməsi xərcləri problemini köklü şəkildə həll etmir.
Yapon yeni dəstəyini qoruyub saxlayıb. USD/JPY məzənnəsi 0,1% azalaraq 158,97 səviyyəsinə enib və ötən ay ABŞ və Yaponiya hökumətlərinin birgə valyuta müdaxiləsi həyata keçirdiyi hədlərdən aşağı qalıb.
Yenin möhkəmlənməsinə Yaponiya Bankının sentyabr ayında faiz dərəcələrini artıracağına dair gözləntilərin güclənməsi də təsir edib. "Reuters"in keçirdiyi sorğuya əsasən, iqtisadçıların əksəriyyəti tənzimləyicinin monetar siyasəti əvvəlki proqnozlardan daha sürətlə sərtləşdirəcəyini düşünür.
Günün ən güclü valyutalarından biri isə Avstraliya dolları olub. AUD/USD məzənnəsi 0,3% yüksələrək 0,718 ABŞ dollarına çatıb və iyunun əvvəlindən bəri ən yüksək səviyyəsini yeniləyib.
Buna səbəb iyul ayı üzrə inflyasiya göstəricilərinin gözləntiləri üstələməsi olub. Aylıq istehlak qiymətləri indeksi 1,0% artaraq proqnozlaşdırılan 0,8%-i geridə qoyub.
İllik inflyasiya 3,8%-dən 3,5%-ə enməsinə baxmayaraq, Avstraliya Ehtiyat Bankının əsas diqqət yetirdiyi kəsilmiş orta inflyasiya göstəricisi (trimmed mean) aylıq ifadədə 0,5% artıb və illik baza inflyasiyası 3,6% səviyyəsində sabit qalıb.
Bu göstəricilər bazarlarda Avstraliya Ehtiyat Bankının bu il növbəti – dördüncü faiz artımına gedəcəyi ilə bağlı gözləntiləri gücləndirib.
Digər Asiya valyutalarında isə vahid tendensiya müşahidə olunmayıb. Yaxın Şərqdə gərginliyin azalacağına dair ümidlər bazarlarda risk iştahasını dəstəkləsə də, investorlar əsasən ABŞ-dən gələcək makroiqtisadi siqnalları gözləyirlər.
Bu fonda Brent markalı neftin qiyməti İranın Hörmüz boğazında gəmiçiliyin idarə olunması ilə bağlı Omanla danışıqları bərpa etməsi xəbərlərindən sonra 2%-dən çox ucuzlaşaraq bir barel üçün təxminən 86,7 dollara enib. Bu da qlobal inflyasiya gözləntiləri üzərində təzyiq yaradıb.
Valyuta bazarında USD/CNY və USD/INR cütləri demək olar ki, dəyişməz qalıb. USD/KRW 0,2%, USD/SGD isə 0,1% yüksələrək Cənubi Koreya vonu və Sinqapur dollarının ABŞ valyutası qarşısında zəiflədiyini göstərib.
MONETAR.AZ
