Neft qiymətləri bu gün səhər saatlarında enişini davam etdirib. Buna səbəb İranın Hörmüz boğazının açılması perspektivi ilə bağlı Omanla danışıqları bərpa etdiyini açıqlaması olub. Bazar iştirakçıları bu xəbəri regionda neft tədarükü risklərinin azalacağına işarə kimi qiymətləndiriblər.
Beləliklə, Omanla aparılan danışıqlar barədə məlumat ABŞ-ın bu həftənin əvvəlində İrana qarşı tətbiq etdiyi yeni və daha sərt iqtisadi sanksiyaların bazara təsirini böyük ölçüdə kölgədə qoyub.
Bakı vaxtı ilə saat 03:58-ə olan məlumata görə, WTI markalı neftin oktyabr fyuçersləri əvvəlki sessiyada 3%-dən çox ucuzlaşdıqdan sonra daha 1,7% dəyər itirərək bir barel üçün 81,01 dollara enib. Brent markalı neftin fyuçersləri isə çərşənbə axşamı keçirilən ticarətdə 5,6% ucuzlaşıb.
Qiymətlərə təzyiq İranın Omanla Hörmüz boğazında kommersiya gəmiçiliyinin idarə olunması üzrə danışıqları yenidən başladığını açıqlamasından sonra artıb. Tərəflər boğazdan keçid üçün "birgə müvəqqəti naviqasiya dəhlizi"nin yaradılması imkanlarını müzakirə edirlər.
Bu perspektiv bazarda tədarük riskləri ilə bağlı narahatlığı zəiflədib. Treyderlər hesab edirlər ki, kommersiya gəmiçiliyinin mərhələli şəkildə bərpası regiondan neft ixracının normallaşmasına şərait yarada bilər. Danışıqlar barədə məlumat yayılmazdan əvvəl İranın bəzi İraq neft tankerlərinin Hörmüz boğazından keçidinə icazə verməsi də bazarın əhvalına müsbət təsir göstərmişdi.
Bununla belə, Hörmüz boğazında gəmiçilik fəaliyyəti hələ də münaqişədən əvvəlki səviyyədən xeyli aşağıdır. Bu isə Yaxın Şərqdən neft tədarükünün tam bərpa olunmadığını göstərir. Münaqişədən əvvəl dünya üzrə neft daşımalarının təxminən 20%-i məhz Hörmüz boğazından həyata keçirilirdi və boğazın bağlanması qlobal bazarda ciddi tədarük problemləri yaradaraq qiymətlərin kəskin yüksəlməsinə səbəb olmuşdu.
İran və Oman arasında danışıqların bərpası ABŞ-ın Tehrana qarşı yeni iqtisadi sanksiyalar elan etməsindən cəmi bir gün sonra baş verib. Vaşinqton bildirib ki, hazırkı mərhələdə hərbi əməliyyatlardan daha çox iqtisadi təzyiq mexanizmlərinə üstünlük verir.
MONETAR.AZ
