Qarajlar daşınmaz əmlak bazarında likvidlik baxımından ən zəif seqment kimi qeydə alınıb.
Monetar.az Azərbaycan Qiymətləndiricilər Palatasına (AQP) istinadən xəbər verir ki, qarajların baza median qiyməti 1 278 manat, cari median qiyməti isə 1 200 manat təşkil edib. Beləliklə, bu seqmentdə qiymətlər 6,1% azalıb, indeks isə 93,9 səviyyəsində qərarlaşıb.
Qarajların satış müddəti 23-33 gün təşkil edir. Bu göstərici onları müqayisə olunan əmlak seqmentləri arasında aşağı likvidlik kateqoriyasına yerləşdirir.
Palatanın təqdim etdiyi məlumatlara görə, qarajların satışında tətbiq olunan diskont 9,9-13,1% intervalındadır.
Müqayisə üçün, yeni tikili mənzillərin satış müddəti 11-15 gün, köhnə tikili mənzillərin satış müddəti isə 15-21 gün təşkil edir. Bu seqmentlər yüksək likvidlik göstəricisi ilə fərqlənir.
Torpaq sahələrində isə əks mənzərə müşahidə olunur. Belə ki, torpaqların median qiyməti baza dövrü ilə müqayisədə 19,2% artaraq 15 900 manata çatıb. Buna baxmayaraq, satış müddəti 18-26 gün təşkil edir və likvidlik orta səviyyədədir.
.
