Cənubi Koreya xarici kapital axınını artırmaq məqsədilə əsas fond birjasında ticarət saatlarını uzadır. “Bloomberg”in məlumatına görə, yeni rejimdən etibarən Koreya Birjasında (“Korea Exchange”) ticarət sessiyası axşam saatlarınadək davam edəcək.
Bazar ertəsindən qüvvəyə minəcək dəyişiklik çərçivəsində “Kospi” və “Kosdaq” indekslərində kotirovka olunan təxminən 2 400 səhm üzrə ticarət Bakı vaxtı ilə saat 15:00-dək aparılacaq. Hazırda adi ticarət sessiyası Bakı vaxtı ilə saat 10:30-da başa çatır.
Uzadılmış sessiyada qısa satış əməliyyatlarına da icazə veriləcək. Lakin birja fondları (ETF) ilkin mərhələdə yeni ticarət rejiminə daxil edilməyəcək.
Ticarət saatlarının artırılması Koreya Birjasının gələcəkdə 24 saatlıq ticarət sisteminə keçmək planının növbəti mərhələsi hesab olunur. Birja həmçinin 2027-ci ilin sonunadək bazaröncəsi (“pre-market”) sessiyanı işə salmağı planlaşdırır.
Cənubi Koreya bu addımı fond bazarının süni intellektə bağlı investisiya dalğası fonunda əhəmiyyətli yüksəliş göstərdiyi bir vaxtda atır. “Kospi” indeksi iyul ayında çatdığı zirvədən 22 faiz geriləsə də, 2026-cı ilin əvvəlindən bəri 64 faiz artım nümayiş etdirir.
Ticarət saatlarının uzadılması Koreya bazarı üçün tamamilə yeni təcrübə deyil. Alternativ ticarət platforması “Nextrade” 2025-ci ilin martında bazaröncəsi və axşam sessiyalarını tətbiq edib. Bir neçə ay ərzində platforma ümumi ticarət aktivliyinin təxminən üçdə birini özünə cəlb edib. Adi ticarət saatlarından kənarda həyata keçirilən əməliyyatların 80 faizindən çoxu isə pərakəndə investorların payına düşüb.
Bununla belə, Koreya Birjasının qarşısında əsas məsələlərdən biri axşam saatlarında institusional likvidliyin təmin edilməsi olacaq. Xarici investorlar ticarət həcminin kifayət qədər formalaşmadığı şəraitdə “Samsung Electronics” və “SK Hynix” kimi iri şirkətlərin səhmləri ilə böyük həcmli əməliyyatlar aparmaqda ehtiyatlı davrana bilərlər.
Aşağı likvidlik alış-satış arasındakı fərqin genişlənməsinə, əməliyyat xərclərinin artmasına və qiymət dəyişkənliyinin yüksəlməsinə səbəb ola bilər. Digər risk isə valyuta hecinqi ilə bağlıdır. Cənubi Koreyanın valyuta bazarı 24 saat fəaliyyət göstərsə də, əsas ticarət saatlarından kənarda aktivliyin azalması xarici fondların hecinq xərclərini artıra bilər.
Ticarət saatlarının uzadılmasını dəstəkləyənlər isə hesab edirlər ki, yeni rejim investorlar üçün daha çox çeviklik yaradacaq. Xüsusilə adi sessiyanın bağlanmasından sonra açıqlanan maliyyə hesabatları və digər mühüm xəbərlərə daha operativ reaksiya vermək mümkün olacaq.
Cənubi Koreyanın bu qərarı ABŞ-də “Nasdaq” və Nyu-York Fond Birjasının ticarət imkanlarını genişləndirmək məqsədilə sessiyaların müddətini artırması istiqamətində atdığı addımlarla eyni qlobal tendensiyanın bir hissəsi kimi qiymətləndirilir.
MONETAR.AZ
