Gas Infrastructure Europe (GIE) təşkilatının məlumatına görə, 1 avqust 2026-cı il tarixinə Avropanın yeraltı qaz anbarlarının (YQA) doluluq səviyyəsi 57,11% təşkil edib. Bu, müşahidələrin aparıldığı 2011-ci ildən bəri avqust ayının əvvəli üçün ən aşağı göstəricidir. Əvvəlki minimum 2021-ci ilin avqustunda qeydə alınmışdı və həmin vaxt doluluq səviyyəsi 57,28% olmuşdu.
Mütləq ifadədə Avropa İttifaqı ölkələrinin yeraltı qaz anbarlarında təxminən 62,4 milyard kubmetr qaz mövcuddur. Bu, ötən ilin eyni dövrü ilə müqayisədə 17,3% azdır. Yay mövsümünün əvvəlindən etibarən ötən illə müqayisədə yaranmış fərq 8,2 milyard kubmetrdən 12 milyard kubmetrə yüksəlib.
İyul ayında Avropa anbarlarına xalis qaz vurulması 8,5 milyard kubmetr təşkil edib ki, bu da son altı ilin ən aşağı göstəricisi olmaqla yanaşı, ötən ilin eyni ayı ilə müqayisədə 21% azdır.
Hesablamalara görə, 2026–2027-ci illər istilik mövsümünün başlanmasına qədər Avropa İttifaqının mövcud normativi yerinə yetirməsi üçün anbarlara azı 68 milyard kubmetr əlavə qaz vurulmalıdır. Avqustun əvvəlinə qədər bu hədəfin yalnız təxminən 32 milyard kubmetri, yəni 47%-ə yaxını icra olunub.
"Gazprom", GIE məlumatlarına istinadən bildirib ki, hazırkı vurulma tempi dəyişməz qalarsa, istilik mövsümünün başlanğıcına qədər Avropadakı qaz anbarlarının doluluq səviyyəsi 75%-i keçməyəcək. Halbuki Avropa Komissiyasının müəyyən etdiyi hədəf 90% təşkil edir.
Qaz ehtiyatlarının azalmasının əsas səbəblərindən biri mayeləşdirilmiş təbii qazın (LNG) idxalındakı geriləmədir. İyul ayında LNG terminallarından Avropa İttifaqının qaz nəqli sisteminə daxil olan qazın həcmi təxminən 8,4 milyard kubmetr olub. Bu göstərici iyun ayı ilə müqayisədə 17%, 2025-ci ilin iyul ayı ilə müqayisədə isə 26% azdır və son iki ilə yaxın dövrün ən aşağı səviyyəsi hesab olunur.
Ümumilikdə, 2026-cı ilin ilk yeddi ayında Avropaya LNG idxalı ötən ilin eyni dövrü ilə müqayisədə 2,5% azalıb.
MONETAR.AZ
