İran yaxın aylarda təbii qaz hasilatını sutkada təxminən 100 milyon kubmetr artırmağı planlaşdırır. Bu barədə ölkənin Neft Nazirliyinin tabeliyində fəaliyyət göstərən "Shana" xəbər agentliyi prezidentin icraçı müavini Məhəmməd Cəfər Qayempananın açıqlamasına istinadən məlumat yayıb.
Məlumata görə, fevralın sonunda başlayan ABŞ-İsrail hücumları nəticəsində İranın enerji infrastrukturuna dəyən zərər səbəbindən ölkənin gündəlik qaz hasilatı təxminən 230 milyon kubmetr azalıb. Bununla belə, ABŞ-ın İranın cənubunda həyata keçirdiyi son zərbələrin əsas enerji obyektlərini hədəf almadığı bildirilir.
Qayempana qeyd edib ki, hasilatdakı azalma ölkədə qaz təchizatında mövcud disbalansı daha da dərinləşdirib. Hücumlardan əvvəl İranın gündəlik qaz hasilatı təxminən 650 milyon kubmetr idi. Onun sözlərinə görə, itirilmiş istehsal güclərinin bərpası enerji təchizatının sabitliyinin gücləndirilməsinə imkan verəcək.
Yay mövsümündə kondisionerlərdən istifadənin artması səbəbindən elektrik enerjisinə tələbatın yüksəlməsi İranın enerji sisteminə əlavə təzyiq göstərir. Bu səbəbdən ölkədə həm yaşayış məntəqələrində, həm də sənaye müəssisələrində növbəli elektrik kəsintiləri tətbiq olunur.
Hökumət enerji sistemindəki yükü azaltmaq üçün istehlakın daha səmərəli idarə olunması, eləcə də günəş elektrik stansiyalarının quraşdırılması hesabına generasiya güclərinin artırılması istiqamətində tədbirlər həyata keçirir.
Rəsmi nümayəndənin sözlərinə görə, davam edən hücumlara baxmayaraq, neft-qaz sektorunda çalışan əməkdaşlar strateji enerji obyektlərinin tam dayanmasının qarşısını ala biliblər. Hökumət isə ilk növbədə sənaye müəssisələri və neft-kimya sektorunun qaz və elektrik enerjisi ilə fasiləsiz təmin olunmasını prioritet hesab edir.
MONETAR.AZ
