Yaxın Şərq ölkələrindən xam neft tədarükü ABŞ və İsrailin İrana qarşı hərbi əməliyyatlarından əvvəlki səviyyəni keçib. Bu barədə Reuters agentliyi Kpler analitik şirkətinin məlumatlarına istinadən xəbər yayıb.
Kpler-in hesablamalarına görə, sentyabrın 24-də, eləcə də 27-29-da regiondan gündəlik neft ixracı 19,5-22,5 milyon barel arasında olub. Halbuki 2025-ci ilin martından 2026-cı ilin fevralınadək olan dövrdə orta gündəlik ixrac 18 milyon barel təşkil edib.
Oktyabrın 1-nə olan yeddi günlük orta göstərici isə sutkada 18,5 milyon barel olub. Hesablamalara Hörmüz boğazı və Qırmızı dəniz vasitəsilə daşımalar, terminallardan ixrac və Oman körfəzində gəmidən-gəmiyə yükləmə əməliyyatları daxil edilib.
Kpler-in məlumatına əsasən, sentyabrın 30-dək olan yeddi gün ərzində regiondan neft, neft məhsulları, kimyəvi maddələr və maye karbohidrogenlərin ümumi ixracı orta hesabla 22,4 milyon barel/gün təşkil edib. Təbii qaz bu hesablamaya daxil edilməyib.
Hörmüz boğazından LNG daşımaları da sentyabr ayında artıb. Bu istiqamətdə həyata keçirilən LNG partiyalarının sayı fevral ayından bəri ən yüksək səviyyəyə çatıb.
Kpler xatırladır ki, İranla müharibə başlamazdan əvvəl Hörmüz boğazından gündə təxminən 125 iri kommersiya gəmisi keçirdi. Marşrutun payına qlobal xam neft və LNG tədarükünün təxminən 20 faizi düşürdü.
Yaxın Şərqdə gərginliyin artması fonunda G7 ölkələrinin energetika nazirləri mart ayında Beynəlxalq Enerji Agentliyi (BEA) ilə koordinasiyalı şəkildə neft bazarında yaranan risklərə qarşı bütün zəruri tədbirləri görməyə hazır olduqlarını açıqlamışdılar.
Oktyabrın əvvəlinə olan məlumata görə, BEA ölkələri tərəfindən bazara çıxarılması vəd edilən 400 milyon barel neftin artıq 325 milyon bareli bazara yönəldilib.
Ötən həftə “Brent” markalı neftin qiyməti 102 dollar/bareldən yuxarı yüksəlib. ABŞ Prezidenti Donald Tramp isə ABŞ və İsrailin İrana qarşı hərbi əməliyyatlarının başa çatmasından sonra neft qiymətlərinin aşağı düşəcəyini bildirib.
MONETAR.AZ
