Avropa Mərkəzi Bankının (ECB) iyulun 23-də keçiriləcək növbəti iclasında əsas faiz dərəcələrini dəyişməz saxlayacağı gözlənilir. Bununla belə, Yaxın Şərqdə artan geosiyasi gərginlik və enerji qiymətlərindəki bahalaşma ilin sonuna qədər əlavə monetar sərtləşdirmə ehtimalını gündəmdə saxlayır.
Bazar iştirakçılarının gözləntilərinə görə, ECB depozit faiz dərəcəsini 2,25% səviyyəsində qoruyacaq. Bununla yanaşı, analitiklər hesab edirlər ki, sentyabr ayındakı qərarın taleyi əsasən inflyasiya dinamikası və enerji bazarındakı vəziyyətdən asılı olacaq.
"ING" bankının iqtisadçıları bildirirlər ki, iyul iclasında 25 baza bəndi həcmində gözlənilməz faiz artımı tam istisna edilməsə də, hazırkı mərhələdə bu ssenari aşağı ehtimallıdır. Onların fikrincə, son vaxtlar neft qiymətlərində müşahidə olunan yüksəliş ECB-nin iyun ayında hazırladığı inflyasiya ssenarisini yenidən aktuallaşdırıb və qiymət təzyiqlərinin davam edə biləcəyinə işarə edir.
Bununla yanaşı, iyun ayı üzrə inflyasiya göstəricilərinin gözləniləndən zəif olması və ikinci dərəcəli inflyasiya təzyiqlərinin hələ də məhdud qalması Mərkəzi Bankın tələsmədən qərar verməsinə imkan yaradır. "ING" hesab edir ki, ECB daxilində daha sərt siyasəti dəstəkləyən üzvlər erkən faiz artımını müdafiə etsələr də, baza ssenarisi növbəti addımın sentyabr ayında atılmasını nəzərdə tutur.
Oxşar mövqeni bölüşən "UBS" analitikləri də iyul iclasında faizlərin dəyişməyəcəyini proqnozlaşdırırlar. Onların fikrincə, ECB konkret tarix göstərmək əvəzinə, ənənəvi olaraq daxil olan makroiqtisadi göstəricilərə əsaslanan (data-dependent) yanaşmasını davam etdirəcək.
Bununla belə, "UBS" sentyabr ayında depozit faiz dərəcəsinin 25 baza bəndi artırılaraq 2,5%-ə çatdırılacağını gözləyir. Analitiklər qeyd edirlər ki, son inflyasiya məlumatları və ECB rəsmilərinin açıqlamaları bu ssenarinin ehtimalını müəyyən qədər azaltsa da, geosiyasi risklərin artması bazarların əlavə faiz artımı gözləntilərini yenidən gücləndirib.
İclasın diqqət çəkən mövzularından biri də bank sektoru üçün minimum ehtiyat normaları ola bilər. "UBS"in qiymətləndirməsinə görə, ECB bu normanı 1%-dən 2%-ə yüksəltməklə bağlı planlara aydınlıq gətirə bilər. Belə qərarın bank sistemində likvidliyi təxminən 170 milyard avro azaltmaqla yanaşı, Mərkəzi Bankın kommersiya banklarına ödədiyi illik faiz xərclərinin də azalmasına şərait yaradacağı bildirilir.
MONETAR.AZ
