Qeyri-Hökumət Təşkilatlarına (QHT) Dövlət Dəstəyi Agentliyi noyabrın 20-də 2027-ci il üzrə kiçik və böyük qrant müsabiqələrinə start verəcək. Layihə təkliflərinin qəbulu dekabrın 20-dək davam edəcək.
AZƏRTAC-ın məlumatına görə, bu barədə Agentliyin Kommunikasiya şöbəsinin müdiri Ülviyyə Qarayeva açıqlama verib.
Onun sözlərinə görə, builki müsabiqələrdə layihələrin innovativliyi, mövcud problemlərə yeni və daha təkmil həll yolları təklif etməsi əsas meyarlar sırasında olacaq. Bununla yanaşı, tərəfdaş təşkilatlarla, aidiyyəti qurumlarla və sosial media ilə əməkdaşlığa, eləcə də dövlətin strateji sənədlərində müəyyənləşdirilmiş hədəflərə töhfə verən ölçüləbilən nəticələrə xüsusi diqqət yetiriləcək.
Müsabiqələr çərçivəsində maliyyələşdirmənin yuxarı həddi kiçik qrantlar üzrə 30 min manat, böyük qrantlar üzrə isə 70 min manat müəyyən edilib. Kiçik qrant layihələrinin icra müddəti 6 ayadək, böyük qrant layihələrinin müddəti isə 9 ayadək olacaq.
Ülviyyə Qarayeva bildirib ki, Agentliyin 2027-ci il üzrə müstəqil şəkildə elan edəcəyi müsabiqələr beş əsas istiqaməti əhatə edəcək. Bunlara azərbaycançılıq ideyasının təşviqi, QHT-lərin sosial media və süni intellekt bacarıqlarının inkişafı, regionlarda aqrar sahədə təşəbbüslər, ailə institutunun möhkəmləndirilməsi, sağlam və təhlükəsiz cəmiyyətin təşviqi, həmçinin beynəlxalq əhəmiyyətli sərbəst təşəbbüslər daxildir.
Agentlik rəsmisi bəzi mövzuların digər dövlət qurumları ilə birgə, “bir pəncərə” prinsipi əsasında keçirilən müsabiqələrdə nəzərə alındığını da qeyd edib.
Layihə təklifləri yalnız elektron qaydada qəbul ediləcək. Bunun üçün Agentliyin elektron xidmətlər portalında “e-ərizə” bölməsi noyabrın 20-dən dekabrın 20-dək aktiv olacaq. Şəxsən, poçt və ya elektron poçt vasitəsilə göndərilən layihə sənədləri qəbul edilməyəcək.
Beləliklə, qrant müsabiqələrində iştirak etmək istəyən QHT-lər layihələrini müəyyən edilmiş müddətdə Agentliyin elektron portalı üzərindən təqdim etməlidirlər.
