İndoneziyada Anak-Krakatau vulkanının püskürməsi davam edir. Vulkan külünün yayılması nəticəsində ölkənin qərbində, o cümlədən Cakartanın əsas beynəlxalq hava limanının da yerləşdiyi ərazidə səkkiz hava limanının fəaliyyəti müvəqqəti dayandırılıb. Məhdudiyyətlər külü daşıyan küləklərin istiqamətinin dəyişməsi və bunun aviasiya üçün yaratdığı risklərlə əlaqədar tətbiq edilib. İndoneziyanın Nəqliyyat Nazirliyinin məlumatına görə, sentyabrın 7-dək 2 300-dən çox reysə təsir edən vəziyyət 270 mindən çox sərnişinə təsir göstərib.
Təkcə Cakartadakı “Soekarno-Hatta” Beynəlxalq Hava Limanında sentyabrın 7-də yüzlərlə reys təxirə salınıb və ya onların cədvəlinə dəyişiklik edilib. Hava limanının fəaliyyətinin dayandırılması sentyabrın 7-si yerli vaxtla saat 18:00-dək uzadılıb.
İndoneziyanın Geologiya Agentliyi Anak-Krakatau vulkanının yenidən püskürmə ehtimalının yüksək olduğunu açıqlayıb. Vulkan külünün müxtəlif yüksəkliklərdə yayılması aviasiya təhlükəsizliyi baxımından risk yaradır.
Ehtiyat tədbiri olaraq Cakartada məktəblərin distant təhsil rejiminə keçirilməsi də daxil olmaqla, bir sıra təhlükəsizlik tədbirləri görülüb. Hökumət qurumlarına, hərbçilərə, polisə və yerli hakimiyyət orqanlarına vəziyyəti fasiləsiz monitorinq etmək və zəruri tədbirləri görmək tapşırılıb.
Anak-Krakatau vulkanında sentyabrın 5-dən etibarən bir neçə püskürmə qeydə alınıb. Püskürmələr zamanı kül və lava tullantıları müşahidə edilib. Vulkanın külü Cakarta və ətraf ərazilərə yayılıb.
İndoneziya hakimiyyəti aviasiya təhlükəsizliyini əsas götürərək hava limanlarının fəaliyyətini kül buludunun hərəkətindən asılı olaraq dəyişir və alternativ hava limanlarından istifadə imkanlarını da nəzərdən keçirir.
MONETAR.AZ
