Almaniyanın Brabus tüner atelyesi Polşanın Sunreef Yachts şirkəti ilə birgə hazırladığı yeni Ultima 55 lüks katamaranını təqdim edib.
Uzunluğu 17 metr olan model Brabus-un korporativ üslubuna uyğun dizayn edilib. Katamaran tünd rəng palitrası, karbon elementləri və premium interyeri ilə seçilir. Salonda karbon lifindən hazırlanmış detallar alkantara, dəri və təbii şpon kimi yüksək keyfiyyətli materiallarla tamamlanıb.
Ultima 55 iki fərqli konfiqurasiyada təklif olunur. Standart versiyada bir master kayuta, bir VIP kayuta və heyət üçün ayrıca kayuta nəzərdə tutulub ki, bu da dörd qonaq və bir ekipaj üzvü üçün kifayətdir. Alternativ versiyada isə üç qonaq kayutası və heyət üçün ayrıca kayuta olmaqla altı nəfərlik yerləşmə imkanı yaradılıb.
Yaxta tam təchiz olunmuş mətbəx zonası ilə təklif edilir. Buraya hündürlüyü tənzimlənən masalar, elektrik sobası, mətbəx çanağı, soyuducular, buzgeneratorları, Bowers & Wilkins audio sistemi və 43 düymlük qatlanan televizor daxildir.
Göyərtədə iri günəşlənmə çarpayıları, açılan masa, elektrik qril və bar piştaxtası yerləşdirilib ki, bu da açıq havada istirahət üçün əlavə komfort yaradır.
Texniki baxımdan Ultima 55 hər biri 10,8 litrlik altısilindrli olmaqla iki mühərriklə təchiz edilib. Ümumi gücü 1 450 at qüvvəsi olan güc qurğusu katamarana 40 düyündən (təxminən 74 km/saat) artıq maksimal sürət qazandırır. Yanacaq çəninin həcmi 1 500 litrdir.
Modelin əsas texnoloji xüsusiyyətlərindən biri də sualtı qanadlar (hydrofoil) sistemidir. Bu sistem su müqavimətini azaldaraq daha yüksək səmərəlilik və daha komfortlu üzmə xüsusiyyətləri təmin edir.
MONETAR.AZ
