Dünyada proqramçıların sayı son illərdə sürətlə artıb. 2025-ci ildə ən böyük proqramçı icmasına ABŞ ev sahibliyi edib. Ölkədə 28 milyon proqramçı olduğu halda, Hindistan 21,9 milyon proqramçı ilə ikinci yerdə qərarlaşıb.
Monetar.az xəbər verir ki, GitHub məlumatları əsasında hazırlanan araşdırmada 2025-ci ildə dünyanın ən böyük 10 proqramçı icması müqayisə edilib və onların 2020-ci ildən sonrakı artımı nəzərdən keçirilib.
ABŞ-da proqramçıların sayı 2020-ci ildəki 10,2 milyondan 2025-ci ildə 28 milyona yüksəlib. Hindistanda isə bu göstərici 4,5 milyondan 21,9 milyona çatıb.
Çin 10,7 milyon proqramçı ilə üçüncü yerdədir. Braziliyada 6,9 milyon, Böyük Britaniyada isə 4,9 milyon proqramçı qeydə alınıb.
Yaponiya 4,5 milyon proqramçı ilə altıncı, Almaniya və İndoneziya hərəyə 4,4 milyonla növbəti yerlərdə qərarlaşıb. Rusiyada 4,2 milyon, Kanadada isə 3,5 milyon proqramçı olduğu göstərilir.
2020-2025-ci illər ərzində proqramçı icmasının ən sürətli artımı Hindistanda qeydə alınıb. Ölkədə bu sahə üzrə icmanın illik mürəkkəb artım tempi 34,4 faiz təşkil edib.
Braziliyada bu göstərici 33,3 faiz, İndoneziyada 33,2 faiz, Yaponiyada isə 28 faiz olub. ABŞ-da proqramçıların sayının illik mürəkkəb artım tempi 21 faiz təşkil edib.
Çin isə siyahıda ən aşağı artım tempinə malik ölkədir. Burada 2020-2025-ci illərdə proqramçı icmasının illik mürəkkəb artım tempi 10,8 faiz olub.
Araşdırmaya əsasən, Hindistanın proqramçı icmasının artım tempinin davam edəcəyi təqdirdə, ölkənin 2028-ci ilə qədər ABŞ-ı keçərək dünyanın ən böyük proqramçı icmasına sahib olması proqnozlaşdırılıb.
